Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 104 Hüküm no: 44 Orijinal metin no: [7a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Simon v. Zan’ın ibrişim bedelinden Dimitri v. Anton v. Yani’de olan alacağını Dimitri’nin vekili Kostantin v. Hristo’nun ödemesi Sinyora cemâ‘atinden işbu râfi‘u’s-sifr Simon v. Zan nâm Yahûdi mahfil-i kazâda mahrûse-i Galata’da Beyoğlu Mahallesi ahâlîsinden olup mahmiye-i İstanbul’da Sipâhî sûkunda Nişli Ali Ağa dükkânında müstecir ve dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîli olduğu yedinde mazmûnu müsbet hüccet ile sâbit olan Kostantin v. Hristo nâm zimmî mahzarında üzerine da‘vâ ve takrîr-i kelâm edip merkūm Dimitri’ye târih-i kitâbdan üç ay mukaddem her bir topu beşer yüz paraya olmak üzere sekiz top ibrişim gaytanımı yüz guruşa ve birer paraya olmak üzere dört yüz zirâ‘ ibrişim şeritimi on guruşa ki cem‘an yüz on guruşa bey‘ ve teslîm ol dahi iştirâ ve kabz etmekle suâl olunup alıverilmesi matlûbumdur dedikde gıbbe’s-suâl vekîl-i merkūm vekâletini ikrâr lâkin husûs-ı mezkûru münkir olmağın müdde‘î-i merkūmdan müdde‘âsını mübeyyine beyyine taleb olundukda Balat hâricinde Alman cemâ‘atinden İlyaz v. Abraham ve yine Balat dâhilinde Selanik cemâ‘atinden İsak v. Haim nâm Yahûdiler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka merkūm Simon gāib-i merkūm Dimitri v. Anton v. Yani’ye târih-i kitâbdan üç ay mukaddem her bir topu beşer yüz paraya olmak üzere sekiz top ibrişim gaytanını yüz guruşa ve her bir zirâ‘ı birer paraya olmak üzere dört yüz zirâ‘ ibrişim şeritini dahi on guruşa ki cem‘an yüz on guruşa bizim huzûrumuzda bey‘ ve teslîm ol dahi ber-vech-i muharrer iştirâ ve tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince meblağ-ı merkūm yüz on guruşu müdde‘î-i merkūma bi’l-vekâle edâya merkūm Kostantin’e tenbîh-birle mâ-vaka‘a bi’t-taleb ketb olundu. Fî-evâili Muharremi’l-harâm sene 1121 Şuhûdü’l-hâl: Es-sâbikūn, es-sâbikūn, es-sâbikūn, es-sâbikūn.