Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 105 Hüküm no: 45 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Yahûdi İsrail v. Arkana’nın düğme ve kaytan bedelinden Dimitri v. Anton v. Yani’de olan alacağını Dimitri’nin vekili Kostantin v. Hristo’nun ödemesi Tüccâr tâifesinden işbu râfi‘u’s-sifr İsrail v. Arkana nâm Yahûdi mahfil-i kazâda dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîli olduğu yedinde mazmûnu müsbet hüccet ile sâbit olan Kostantin v. Hristo nâm zimmî mahzarında üzerine da‘vâ ve takrîr-i kelâm edip bundan akdem gāib-i merkūm Dimitri’ye destesi yarımşar guruşa olmak üzere yüz elli deste incili düğmemi yetmiş beş guruşa ve destesi üçer guruşa olmak üzere üç deste kırmızı gaytanımı dokuz guruşa bey‘ ve teslîm ol dahi iştirâ ve kabz etmekle suâl olunup semenleri olan cem‘an seksen dört guruşu bana edâya vekîl-i merkūma tenbîh olunmak matlûbumdur dedikde gıbbe’s-suâl vekîl-i merkūm cevâbında ber-vech-i muharrer vekâletini ikrâr lâkin husûs-ı mezkûru inkâr edicek müdde‘î-i merkūmdan müdde‘âsını mübeyyine beyyine taleb olundukda mahmiye-i İstanbul’da Cibalikapısı hâricinde sâkin Mosi v. Heyder ve Ayakapısı hâricinde sâkin diğer Mosi v. Yako nâm Yahûdiler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka müdde‘î-i merkūm gāib-i merkūm Dimitri v. Anton v. Yani’ye bundan akdem destesi yarımşar guruşa olmak üzere yüz elli deste incili düğmesini yetmiş beş guruşa ve destesi üçer guruşa olmak üzere üç deste kırmızı gaytanını dokuz [guruşa] bizim huzûrumuzda bey‘ ve teslîm ol dahi ber-vech-i muharrer iştirâ ve tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince cem‘an seksen dört guruşu müdde‘î-i merkūma edâya vekîl-i merkūma tenbîh-birle mâ-vaka‘a bi’t-taleb ketb olundu. Fî-evâili Muharremi’l-harâm sene 1121 Şuhûdü’l-hâl: Es-sâbikūn, es-sâbikūn, es-sâbikūn.