Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 106 Hüküm no: 46 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Hristodori v. Matuh’un atlas bedelinden Dimitri v. Anton v. Yani ile ortağı Lambo v. Dimitri’de olan alacağının ödenmesi Tüccâr tâifesinden işbu râfi‘u’s-sifr Hristodori v. Matuh nâm zimmî mahfil-i kazâda mahrûse-i Galata’da Beyoğlu Mahallesi ahâlîsinden olup mahmiye-i İstanbul’da Sipâhî sûkunda vâki‘ Nişli Ali Ağa dükkânında müstecir ve dikilmiş çuka yapağı olan Dimitri v. Anton v. Yani nâm zimmî tarafından düyûn-ı müsbitesini edâya vekîli olduğu yedinde mazmûnu müsbet hüccet ile sâbit olan Kostantin v. Hristo ile gāib-i mezbûrun şerîki Lambo v. Dimitri mahzarlarında takrîr-i da‘vâ ve tasvîr-i müdde‘â edip mezbûrân zimmetlerinde zirâ‘ı beynimizde ma‘lûm beyaz atlas semenlerinden altmış iki guruş hakkım olup hattâ meblağ-ı mezbûr bana deynleri olduğunu ikrâr dahi ettiklerinden sonra meblağ-ı merkūmun yirmi beş guruşunu ahz ve istîfâ edip otuz yedi guruşu zimmetlerinde bâkī kalmağla ve iki top beyaz atlas dahi kendilere emânet vaz‘ ve teslîm etmemle suâl olunup meblağ-ı bâkī-i mezbûru ve mârru’z--zikr atlasın mevcûd ise aynını müstehlek ise ba‘de’s-sübût kıymetini bana edâya tenbîh olunmak matlûbumdur dedikde gıbbe’s-suâl vekîl-i merkūm vekâletini ikrâr lâkin husûs-ı mezkûru inkâr eylediklerinde müdde‘î-i merkūmdan müdde‘âsını mübeyyine beyyine taleb olundukda mahmiye-i mezbûrede Mirâhor Mahallesi’nde sâkin Anton v. Yani ve Abdi Subaşı Mahallesi’nde sâkin Yanaki v. Dimitri nâm zimmîler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka gāib-i merkūm Dimitri v. Anton v. Yani ile şerîki işbu Lambo müdde‘î-i mezbûra zikr olunan atlas bahâsından altmış iki guruş müdde‘î-i mezbûra deynimizdir deyü bizim huzûrumuzda ikrâr ve sâlifü’z-zikr iki top atlası dahi bi-tarîkı’l-vedî‘a ahz u kabz eylediklerini dahi i‘tirâf ve bizi işhâd eylediler biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince baʻde’l-hükm müdde‘î-i merkūm bi-tarîkı’l-vedî‘a vaz‘ eylediğim iki top atlasın aynı mevcûd olmağla ahz u kabz eyledim deyü i‘tirâf ettiğinden sonra meblağ-ı bâkī-i mezkûr otuz yedi guruşu müdde‘î-i merkūma edâya ba‘de’t-tenbîh mâ-vaka‘a bi’t-taleb ketb olundu. Fî 29 min-Zilhicceti’ş-şerîfe sene 1120 Şuhûdü’l-hâl: el-Hâc Mustafa Efendi tâbi‘-i efendi, el-Hâc Hüseyin Beşe Çukadâr, Mustafa Efendi b. Ali el-Kâtib, Mustafa Çelebi b. ( ) ve gayruhum mine’l-huzzâr.