Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 106 Hüküm no: 47 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Yako v. Benyamin’in çuka bedelinden Dimitri v. Anton v. Yani’de olan alacağını vekili Kostantin v. Hristo’nun ödemesi Hasköy’de sâkin işbu râfi‘u’s-sifr Yako v. Benyamin nâm Yahûdi mahfil-i kazâda mahrûse-i Galata’da Beyoğlu Mahallesi’nden olup mahmiye-i İstanbul’da Sipâhî sûkunda vâki‘ Nişli Ali Ağa dükkânında müstecir ve dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîli olduğu yedinde mazmûnu müsbet hüccet ile sâbit olan Kostantin v. Hristo nâm zimmî mahzarında üzerine da‘vâ ve takrîr-i kelâm edip gāib-i merkūm Dimitri’ye târih-i kitâbdan dört ay mukaddem yüz birer guruşa olmak üzere iki pastav çukamı iki yüz iki guruşa bey‘ ve teslîm ol dahi iştirâ ve tesellüm etmekle vekîl-i merkūma suâl olunup meblağ-ı mezbûru bi’l-vekâle bana edâya tenbîh olunmak matlûbumdur dedikde gıbbe’s-suâl vekîl-i merkūm cevâbında vekâlet-i mezkûreyi ikrâr lâkin husûs-ı mezkûru münkir olmağın müdde‘î-i merkūmdan müdde‘âsını mübeyyine beyyine taleb olundukda Balatkapısı hâricinde sâkin Baruh v. İlya ve Karaki Mahallesi’nde sâkin Sefer v. Mosi nâm Yahûdiler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka müdde‘î-i merkūm Yako gāib-i merkūm Dimitri v. Anton v. Yani’ye târih-i kitâbdan dört ay mukaddem her pastavı yüz birer guruşa olmak üzere iki pasdav londrine çukasını iki yüz iki guruşa bizim huzûrumuzda bey‘ ve teslîm ol dahi iştirâ ve tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince baʻde’l-hükm meblağ-ı mezbûru müdde‘î-i merkūma bi’l-vekâle edâya merkūm Kostantin’e tenbîh-birle mâ-vaka‘a bi’t-taleb ketb olundu. Fî 2 mine’l-Muharremi’l-harâm sene 1121 Şuhûdü’l-hâl: el-Hâc Mustafa Efendi tâbi‘-i efendi, el-Hâc Mehmed Çelebi, el-Hâc Hüseyin Beşe Çukadâr, Mustafa Çelebi b. ( ) ve gayruhum mine’l-huzzâr.