Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 107 Hüküm no: 48 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Nihoda b. Yasef’in çuka bedelinden Dimitri v. Anton v. Yani’de olan alacağını vekili Kostantin v. Hristo’nun ödemesi Tâife-i Yahuddan Kedüz cemâ‘atinden Yahûda b. Yasef nâm Yahûdi mahfil-i kazâda mahrûse-i Galata’da Beyoğlu Mahallesi’nden olup mahmiye-i İstanbul’da Sipâhî sûkunda Nişli Ali Ağa dükkânında müstecir ve dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîli olduğu yedinde mazmûnu müsbet hüccet ile sâbit olan Kostantin v. Hristo nâm zimmî mahzarında üzerine da‘vâ ve takrîr-i kelâm edip merkūm Dimitri’ye bundan mukaddem her zirâ‘ı üçer yüz akçeye olmak üzere dört yüz otuz dokuz zirâ‘ Fransız londrinesi çukamı bin doksan yedi buçuk guruşa bey‘ ve teslîm ol dahi iştirâ ve tesellüm etmekle suâl olunup alıverilmesi matlûbumdur dedikde gıbbe’s-suâl vekîl-i merkūm cevâbında ber-vech-i muharrer vekâletini ikrâr lâkin husûs-ı mezkûru inkâr edicek müdde‘î-i merkūmdan müdde‘âsını mübeyyine beyyine taleb olundukda Unkapanı hâricinde sâkin Aragon cemâ‘atinden Mihal v. Yako ve Sultanhamamı kurbünde İştib cemâ‘atinden Salom v. Yasef nâm Yahûdiler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka müdde‘î-i merkūm Nihoda merkūm Dimitri v. Anton v. Yani’ye bundan akdem zirâ‘ı üçer yüz akçeye olmak üzere dört yüz otuz dokuz zirâ‘ Fransız londrinesi çukasını bin doksan yedi buçuk guruşa bizim huzûrumuzda bey‘ ve teslîm ol dahi iştirâ ve tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince baʻde’l-hükm meblağ-ı mezbûru edâya vekîl-i merkūma tenbîh-birle mâ-vaka‘a bi’t-taleb ketb olundu. Fî-gurreti Muharremi’l-harâm sene 1121 Şuhûdü’l-hâl: Es-sâbikūn, es-sâbikūn, es-sâbikūn.