Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 108 Hüküm no: 49 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haim v. Mordehay ve hanımı Çera bt. Haim’in çocuklarının ölümüne sebep olan kaldırımcı Yani v. Tanaş’a açtıkları davada sulh oldukları Mahmiye-i İstanbul’da Unkapanı kurbünde sâkin Yahud tâifesinden Haim v. Mordehay ve zevcesi Çera bt. Haim nâm Yahûdiler meclis-i şer‘-i şerîf-i nebevîde kaldırımcı tâifesinden işbu bâ‘isü’s-sifr Yani v. Tanaş nâm zimmî muvâcehesinde her biri ikrâr ve takrîr-i kelâm edip târih-i kitâbdan iki gün mukaddem Unkapanı İskelesi’nde taş vezn eder iken mezbûr Yani’nin te‘addîsinden çeki taşı direkleri yıkılıp sagīr oğlum Mordehay altında kalıp sol kulağı ve başının sol tarafı mecrûh olduğu hâlde müteessiren hâlik oldu deyü sagīr-i mezbûrun dem ve diyetini mezbûr Yani’den taleb ve da‘vâ eylediğimizde ol dahi inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî beynimize muslihûn tavassut edip da‘vâ-yı mezkûremden bizi mezbûr Yani ile on sekiz guruş üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûr on sekiz guruşu mezbûr Yani yedinden tamamen ahz u kabz edip husûs-ı mezbûra müte‘allika âmme-i de‘âvî ve mutâlebât ve kâffe-i eymân ve muhâsamâtdan biz mezbûr Yani’nin zimmetini ibrâ-i âmm-ı kātı‘u’n-nizâ‘la ibrâ ve iskāt-ı tamm-ı râfi‘u’l-hısâm ile ibrâ ve iskāt eyledik mezbûr Yani dahi bedel-i sulh deyü bize medfû‘u olan meblağ-ı mezbûr on sekiz guruşa müte‘allika cemî‘ de‘âvî ve mutâlebâtdan bizim zimmetimizi ibrâ ve iskāt eyledi fîmâ-ba‘d husûs-ı mezbûra müte‘allika birbirimiz ile vechen mine’l-vücûh ve sebeben mine’l-esbâb da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Cumâdelûlâ sene 1121 Şuhûdü’l-hâl: Mumcu Ali Çelebi b. Abdullah, Mumcu Süleyman b. Ahmed, Mumcu Abdullah Çelebi b. Ahmed, Ali b. Zeynel Taşçı, Bayezid b. Ahmed, Hasan Beşe b. Hüseyin, Mumcu Abdullah Beşe b. Mustafa, Mustafa Beşe b. Hüseyin, Hüseyin b. Mustafa, Murtaza b. Ebûbekir, Mustafa b. Şa‘ban, Süleyman b. Abdullah ve gayruhum mine’l-huzzâr.