Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 109 Hüküm no: 50 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. İsmail’in Ahmed Bey b. Mehmed’deki alacağını taksitler halinde ödemesini kabul edip zimmetini ibra ettiği Mahmiye-i İstanbul’da Kefeli Mahallesi’nde sâkin işbu [bâ‘isü’-]l-kitâb Mustafa Bey b. İsmail nâm kimesne meclis-i şer‘-i şerîf-i enverde Ahmed Bey b. Mehmed nâm kimesne mahzarında ikrâr ve takrîr-i kelâm edip mezbûr Ahmed Bey ile beynimizde nice ahz u i‘tâ ve mu‘âmelât-ı şettâ vâki‘ olup beynimizde olan hesâbı gördüğümüzde cihet-i deyn-i şer‘îden bana yüz guruş deyni olduğunu ikrâr ve meblağ-ı mezbûru vech-i şer‘î üzere te’cîl ve taksît eylediğimizden sonra meblağ-ı mezbûrdan mâ‘adâ târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan mezbûr Ahmed Bey’in zimmetini ibrâ ve iskāt edip ol dahi kezâlik beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Cumâdelûlâ sene 1121 Şuhûdü’l-hâl: Ali Çavuş b. Abdullah, Mehmed b. Ramazan, Mehmed b. Ramazan, Mehmed Çelebi b. Ahmed, el-Hâc Mustafa b. İbrahim, el-Hâc Hüseyin b. Osman, Salih Efendi [b.] Abdullah, Monla İbrahim b. Derviş, Mustafa Çelebi b. Şa‘ban, Hasan Çelebi b. Abdullah, Ali Çelebi b. Bâli ve gayruhum mine’l-huzzâr.