Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 109 Hüküm no: 51 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni David v. Agop’un evini Mehmed Ağa b. Ali’ye sattığı Mahmiye-i İstanbul’da Langa kurbünde vâki‘ Kâtib Kasım Mahallesi sâkinlerinden David v. Agop nâm Ermeni meclis-i şer‘-i şerîf-i enverde işbu râfi‘u’l-kitâb Mehmed Ağa b. Ali nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup Sultan Mehmed Hân Câmi‘-i şerîfi kurbünde vâki‘ İskenderpaşa Mahallesi’nde vâki‘ bir tarafdan Ahmed Çelebi mülkü ve bir tarafdan benim âhar mülküm ve iki tarafdan tarîk-i âm ile mahdûd dâhilen bir bâb oda ve bir bâb tahtânî oda ve bir sofa ve hâricen bir bâb fevkānî oda ve tahtında bir ahır ve kenîf ve havlu ve merkūm David tarafında binâ altında vâki‘ dolma duvar müşterek olup üç tarafı taş duvarı müştemil mülk menzilimi cümle tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Mehmed Ağa’ya dört yüz seksen guruşa bey‘ ve teslîm ve temlîk ol dahi vech-i meşrûh üzere iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr dört yüz seksen guruşu merkūm Mehmed Ağa yedinden tamamen ahz u kabz eyledim baʻde’l-yevm menzil-i mahdûd-ı mezbûrda alâka ve medhalim kalmayıp merkūm Mehmed Ağa’nın mülk ve hakkı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fî 21 min-Cumâdelûlâ sene 1121 Şuhûdü’l-hâl: Ahmed Efendi b. Mustafa, Mehmed Çelebi b. Mehmed Çorbacı, Ali Ağa b. Mustafa Çorbacızâde, Mehmed Çelebi b. Ali Çorbacızâde, Süleyman Efendi b. Ahmed, Mehmed Çelebi b. Mustafa, Hasan Beşe b. Mustafa Çukadâr, Osman b. Ahmed Ahşabcı, Hoca İsmail Efendi b. Mustafa, Mustafa Çelebi b. el-Hâc Abdullah, Ahmed Ağa b. el-Hâc Selim Ağa, Ebûbekir b. Osman, Ebûbekir b. Hüseyin, Halil b. Mustafa, Mehmed b. Mustafa, İbrahim Çelebi b. Mehmed Hallâc, Mustafa b. Mehmed Hallâc, es-Seyyid Mahmud Efendi Hallâc, Konyalı Çukadâr Mehmed ve gayruhum mine’l-huzzâr.