Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 110 Hüküm no: 53 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hüseyin’in talebiyle boşandığı kocası Seyyid Feyzullah’ın ödemesi şartıyla küçük çocukları Rukiye’ye nafaka takdir edildiği Mahmiye-i İstanbul’da Ali Paşa-yı Atîk Mahallesi’nde sâkine zâtı ta‘rîf-i şer‘î ile mu‘arrefe olan işbu râfi‘atü’l-kitâb Fâtıma bt. Hüseyin nâm hatun mahfil-i kazâda zevc-i sâbıkı es-Seyyid Feyzullah b. ( ) nâm kimesne mahzarında takrîr-i kelâm ve tâʻbir ani’l-merâm edip zevcim mezbûrun firâşından hâsıla ve benden mütevellîde bi-hakkı’l-hıdâne hacr ve terbiyemde işbu sadriye sagīre kızım Rukiye’nin nafaka ve kisveye ihtiyâcı olmağla kıbel-i şer‘den kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri tarafeynin rızâsıyla mezbûre Rukiye’nin nafaka ve kisvesiʼçün beher yevm altışar akçe babası mezbûr üzerine farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisvesine harc u sarfa ve lede’l-iktizâ istidâneye ve inde’z-zafer babası mezbûr üzerine rücû‘a mezbûre Fâtıma’ya izin vermeğin mâ-vaka‘a bi’t-taleb ketb olundu. Fî 7 min-Rebîʻülâhir sene 1121 Şuhûdü’l-hâl: Mustafa b. Şa‘ban, Ali b. Bâli, Hasan b. Mustafa, Ali b. İvaz, Süleyman b. Abdullah ve gayruhum mine’l-huzzâr.