Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 111 Hüküm no: 54 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Kırımlı Ali Beşe b. Ahmed’in Çerkes Ömer Beşe b. Abdullah’da olan alacağının ödenmesi ve emanet verdiği kılıcın da iadesi Cemâ‘at 80 Tüccâr tâifesinden işbu râfi‘u’l-kitâb Kırımî Ali Beşe b. Ahmed nâm kimesne mahfil-i kazâda Çerkes Ömer Beşe b. Abdullah nâm kimesne mahzarında üzerine da‘vâ ve takrîr-i kelâm edip mezbûr Ömer Beşe’ye târih-i kitâbdan beş sene mukaddem Tophâne’de Çubukçu Limanı nâm mevzi‘de vâki‘ odalarda mezbûr Ömer Beşe ile bir odada sâkin olduğumuz hâlde mezbûr Ömer Beşe vilâyetine gitmek sadedinde benden istikrâz etmekle mâlımdan kendiye altı yüz guruşluk cedîd zolotamı ikrâz ve teslîm ol dahi iktirâz ve kabz ettiğinden sonra vilâyetine gidip hâlâ gelmekle ikrârı mertebesi olan iki yüz guruşu el-ân bana edâ edip dört yüz guruşu zimmetinde bâkī kalmağla suâl olunup meblağ-ı bâkī-i mezbûru ve mukaddemâ yedimden kabz eylediği beynimizde ma‘lûm bir kılıcı bana teslîme mezbûr Çerkes Ömer’e tenbîh olunmak matlûbumdur dedikde gıbbe’s-suâl mezkûr Ömer cevâbında müdde‘î-i mezbûra ancak deynim kabzını i‘tirâf eylediği iki yüz guruşdur deyü ziyâde dört yüz guruşunu inkâr ve mârru’z--zikr kılıca müdde‘î-i mezbûr bana hibe etmişidi deyücek isre’l-istintak ve’l-inkâr evvelen müdde‘î-i mezbûrdan ziyâde da‘vâsını mübeyyine beyyine taleb olundukda udûl-i Müslimînden olup Tophâne’de Perviz Ağa Mahallesi’nde sâkin Çubukçu Mehmed b. Mustafa ve yine Tophâne’de Muhyiddin Mahallesi’nde sâkin diğer Mehmed b. Ali ve Çukur Câmi‘-i şerîf kurbünde sâkin Kayıkçı Mehmed b. Mustafa ve İstanbul’da Kadırga Limanı kurbünde Çatal Fırın semtinde sâkin el-Hâc Veli b. Hasan nâm kimesneler li-ecli’ş-şehâde <> mahfil-i kazâya hâzirûn olup istişhâd olunduklarında fi’l-hakīka müdde‘î-i mezbûr Ali Beşe târih-i kitâbdan beş sene mukaddem işbu mezbûr Çerkes Ömer Beşe’ye mârru’z--zikr Çubukçu Limanı’nda sâkin olduğu oda önünde vâki‘ sofada altı yüz guruşluk cedîd zolotasını bizim huzûrumuzda ikrâz ve teslîm ol dahi iktirâz ve kabz edip bizleri işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde şuhûd-ı mezbûrûn mahalleleri ahâlîsinden ta‘dîl ve tezkiye olunduklarından sonra şehâdetleri makbûle olmağın mûcebince meblağ-ı bâkī-i mezbûr dört yüz guruşu müdde‘î-i mezbûra edâya merkūm Çerkes Ömer’e ba‘de’t-tenbîh sâniyen mezbûr Çerkes Ömer’den hibe-i mezkûreyi mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ mârru’z--zikr kılıcı mezbûr Ömer’e hibe ve temlîk etmediğine mezbûr Ali Beşe’ye yemîn teklîf olundukda ol dahi alâ-vefkı’l-mesûl yemîn biʼllâhi te‘âlâ etmeğin mûcebince mârru’z--zikr kılıcın mevcûd ise aynını müstehlek ise ba‘de’s-sübût kıymet-i şer‘iyyesini dahi müdde‘î-i mezbûra edâ ve teslîme mezbûr Çerkes Ömer Beşe’ye tenbîh-birle mâ-vaka‘a bi’t-taleb ketb olundu. Fî-muntasıfı Cumâdelûlâ sene 1121. Şuhûdü’l-hâl: el-Hâc İbrahim Odabaşı, Mehmed Beşe Kasımpaşalı el-Mübâşir, Mehmed Beşe b. ( ), Hüseyin Beşe b. ( ), Abdullah Efendi el-İmâm ve’l-Müezzin?, Mehmed Beşe b. ( ), el-Hâc Hasan Beşe Çukadâr, el-Hâc Ali Kahveci ve gayruhum mine’l-huzzâr. Sahh Beyaz