Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 113 Hüküm no: 57 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Hasan Ağa’nın Serezli Ahmed Ağa b. Mustafa’ya sattığı Çerkes asıllı Hüsnüşah cariyenin bedelinden kalan alacağına karşılık Çerkes bir cariye ve bir miktar para alarak anlaştıkları Mahmiye-i İstanbul’da Aksaray kurbünde Koğacıdede Mahallesi’nde sâkine Afife bt. Hasan Ağa b. Abdullah nâm hatunun zevci ve tarafından husûs-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân Mustafa Çelebi b. Yahya ve Ahmed Çelebi b. Ali nâm kimesneler şehâdetleriyle şer‘an sâbit olan Ahmed Ağa b. Hasan Efendi nâm kimesne meclis-i şer‘-i şerîf-i enverde işbu râfi‘u’l-kitâb Serezli diğer Ahmed Ağa b. Mustafa nâm kimesne mahzarında bi’l-vekâle ikrâr ve takrîr-i kelâm edip bundan akdem mezbûr diğer Ahmed Ağa müvekkilem mezbûre yedinden vasfı beynlerinde ma‘lûm bir re’s Çerkesiyyetü’l-asl Hüsnüşah nâm câriyeyi dokuz yüz guruşa iştirâ ve semeninden iki yüz elli guruşunu gāib ani’l-meclis el-Hâc Receb ile irsâl ve yüz guruşunu benimle irsâl ve yüz elli guruşunu kendi nefsine teslîm edip bâkī zimmetinde dört yüz guruş hakkım kaldı deyü da‘vâ ol dahi tamamen def‘ eyledim deyü da‘vâyı def‘le mukābele ve def‘ini isbât sadedinde iken beynlerine muslihûn tavassut edip da‘vâ-yı mezkûresinden müvekkilem merkūmeyi merkūm Serezli diğer Ahmed Ağa ile yüz yetmiş guruş kıymetli bir re’s Gürciyyetü’l-asl câriye ile nakd seksen guruş ki cem‘an altı yüz elli guruş üzerine sulh eylediklerinde < > müvekkilem mezbûre dahi sulh-ı mezbûru kabûl ve bedel-i sulh olan câriye-i mezbûre ile nakd seksen guruşu diğer Ahmed Ağa yedinden tamamen ahz u kabz edip meblağ-ı bâkī yüz elli guruşa müte‘allika âmme-i de‘âvî ve mutâlebât ve eymân ve muhâsamâtdan mezbûr diğer Ahmed Ağa’nın zimmetini ibrâ ve iskāt edip ol dahi bedel-i sulh-ı mezkûra ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan müvekkilemin ve benim zimmetimi ibrâ-i âm ile ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 min-şehri Rebîʻülâhir sene 1121 Şuhûdü’l-hâl: Mübâşirînden Çavuş b. İbrahim, Ali Beşe b. Mehmed, Mehmed Ağa b. Muslu, el-Hâc İbrahim b. ( ), el-Hâc Yusuf b. Abdullah, Hüseyin Ağa b. Şa‘ban, Yusuf Çelebi b. Abdullah, Halil Çelebi Kasab, Mustafa Odabaşı ve gayruhum mine’l-huzzâr.