Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 114 Hüküm no: 58 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gürcü Mahmud Mahallesi ahalisinin yere düşen musallâ taşını eski yerine koymak istemelerine mani olan Mehmed Ağa b. Şa‘ban’ın müdahaleden men edildiği Zikri âtî husûsu mahallinde istimâ‘ için bâ-fermân-ı âlî savb-ı şer‘-i enverden Mevlânâ İmâmzâde Mehmed Efendi irsâl olunup ol dahi mahmiye-i İstanbul’da Gürcü Mahmud Mahallesi’nde ve Ebâ Eyyüb-i Ensârî Kapısı hâricinde iskelebaşında vâki‘ Pereme çekecek yer? demekle ma‘rûf olup merhûm Ferruh Kethüdâ Vakfı’ndan ve Mehmed Ağa b. Şa‘ban nâm kimesnenin tasarrufunda olan arsa üzerine varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i şerîf eyledikde ahâlî-i mahalle-i mezbûreden Mehmed Çelebi b. Ahmed ve Ali Çelebi b. Abdullah ve Mehmed Ağa b. Ahmed ve Ahmed Çelebi b. Mehmed ve Ali Çelebi b. Şa‘ban ve sâirleri meclis-i ma‘kūd-ı mezkûrda mezbûr Mehmed Ağa mahzarında her biri üzerine da‘vâ ve takrîr-i kelâm edip işbu müşâhede olunan mahalde vakfiye-i ma‘mûlün-bihâda tasrîh olunduğu vech üzere mevtâ-yı Müslimînin namazı kılınmak için bir musallâ taşı olup zamân mürûru ile zikr olunan taş mahallinden düşüp ahâlî-i mahalleden mevtâ-yı Müslimînin namazı kılınmak için gayrı mahal olmamağla zikr olunan musallâ taşını mahalline vaz‘ etmek murâd eylediğimizde mezbûr Mehmed Ağa mâni‘ olur suâl olunup mümâna‘at etmemek üzere tenbîh olunmak matlûbumuzdur dediklerinde gıbbe’s-suâl ve akībe’l-inkâr müdde‘ûn-ı mezbûrûndan takrîr-i meşrûhlarına mutâbık beyyine taleb olundukda udûl-i ricâl-i Müslimînden olup mahalle-i mezbûrede el-Hâc İlyas Mahallesi’nde sâkin el-Hâc Yusuf b. İlyas ve Tokludede Mahallesi’nde sâkin Ömer Odabaşı b. Ebûbekir nâm kimesneler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-vâki‘ merhûm Ferruh Kethüdâ’nın vakfiye-i ma‘mûlün-bihâsında tasrîh olunduğu vech üzere mevtâ-yı Müslimînin namazı kılınmak işbu mahalde kadîmden bir musallâ taşı var idi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle zikr olunan taşı müdde‘ûn-ı mezbûrûn mahall-i mezbûra vaz‘ etmelerine mümâna‘at etmemek üzere mezbûr Mehmed Ağa’ya tenbîh eylediğini mevlânâ-yı mezbûr mahallinde tahrîr, ba‘dehû ma‘an ba‘s olunan Mehmed b. Hüseyin ve Hüseyin b. Abdullah ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 8 min-şehri Rebîʻülâhir sene 1121 Şuhûdü’l-hâl: Çorbacı Osman Ağa b. Mustafa, Hüseyin Beşe b. Mehmed, es-Seyyid İbrahim Çelebi b. İsmail, Hüseyin b. Şa‘ban, Mustafa Çelebi b. Şa‘ban ve gayruhum mine’l-huzzâr.