Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 115 Hüküm no: 59 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Nebi’nin Ermeni David Kalfa v. Yakob’dan satın aldığı ev satışının iptal edilemeyeceğinden kalan borcunu David’de ödemesi Mahmiye-i İstanbul’da Sultan Mehmed Hân Câmi‘-i şerîfi kurbünde vâki‘ Hasan Halîfe Mahallesi sükkânından Mehmed b. Nebi nâm kimesne meclis-i şer‘-i şerîf-i enverde işbu râfi‘u’s-sifr David Kalfa v. Yakob nâm Ermeni muvâcehesinde üzerine da‘vâ ve takrîr-i kelâm edip bundan akdem mezbûr David mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzilini üç yüz guruşa bana bey‘ ve elli bir guruşu kendiye teslîm ben dahi yedinden iştirâ ve kabz edip semen-i mezbûrun iki yüz kırk dokuz guruşu zimmetinde kalmışidi lâkin meblağ-ı mezbûr menzil-i mezbûrun semen-i mislidir deyü merkūm David beni tağrîr edip hâlâ bey‘-i mezbûr tağrîr ve gabn-i fâhiş ile olmağın mezbûr David’e suâl olunup menzil-i mezbûru geri red ve meblağ-ı mezbûrdan semen olmak üzere kendiye medfû‘um olan elli bir guruşu bana teslîme tenbîh olunmak matlûbumdur dedikde gıbbe’s-suâl merkūm David cevâbında menzil-i mahdûd-ı mezbûru meblağ-ı mezbûra bey‘ini ikrâr lâkin bey‘-i mezbûrda ber-vech-i muharrer gabn-i fâhiş olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyine için izhâr-ı acz ile istihlâf etmeğin fi’l-hakīka bey‘-i mezbûrda tağrîr ve gabn-i fâhiş olmayıp ol vechile müdde‘î-i mezbûru tağrîr etmediğine merkūm David’e yemîn teklîf olundukda ol dahi hasbe’l-mesûl yemîn biʼllâhi’llezî enzele’l-İncîle alâ İsa aleyhi’s-selâm etmeğin mûcebince meblağ-ı bâkī-i mezbûr iki yüz kırk dokuz guruşu merkūm David’e edâ ve teslîme müdde‘î-i mezbûr Mehmed’e tenbîh-birle mâ-vaka‘a bi’t-taleb ketb olundu. Fî 12 min-şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa el-Muhzır, Osman b. Hasan el-Muhzır ve gayruhum mine’l-huzzâr.