Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 116 Hüküm no: 61 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mustafa Ağa b. Receb’in vefât eden hanımı Ümmühani Hatun bt. Hacı Mahmud’un ölmeden önce bazı eşyalarını emanet bıraktığı iddiasıyla baldızı Ayşe’ye açtığı davayı ispat edemediği Vilâyet-i Anadolu’da Kal‘a-i Sultânîye’de sâkine iken bundan akdem vefât eden Ümmühani Hatun bt. el-Hâc Mahmud’un verâseti zevc-i metrûku kal‘a-i mezbûre dizdârı el-Hâc Mustafa Ağa b. Receb ile sadriye kebîre kızı Âişe ve sadrî oğlu Mahmud nâm sagīre münhasıra olduğu zâhir ve mütebeyyin oldukdan sonra sagīr-i mezbûrun tesviye-i umûruna kıbel-i şer‘-i mergūbdan mansûb vasîsi olan mezbûr el-Hâc Mustafa Ağa ile mezbûre Âişe taraflarından husûs-ı âti’z-zikre vekîl olduğu yedinde olan vekâlet hücceti mantûku üzere şer‘an sâbit olan el-Hâc Hüseyin b. Receb nâm kimesne meclis-i şer‘-i şerîf-i enverde işbu râfi‘atü’l-kitâb müteveffiye-i mezbûrenin li-ebeveyn kız karındaşı Âişe bt. Mahmud nâm hatun mahzarında bi’l-vekâle üzerine da‘vâ ve takrîr-i kelâm edip bundan akdem müteveffiye-i mezbûre hâl-i hayâtında eşyâ-i memlûkesinden bir sepet içinde mahfûz bir sincab kürk ve bir telli hatâyî kaftan ve bir telli hatâyî anteri ve bir serpûş ve bir ferâce ve iki sandal kaftan ve bir sandal anteri ve sâir eşyâ-i ma‘lûmesini kız karındaşı mezbûre Ayşe’ye emânet vaz‘ edip kable’l-ahz vefât etmekle eşyâ-i mezkûre müvekkillerim mezbûrân Âişe ve el-Hâc Mustafa Ağa ile sagīr-i mezbûr Mahmud’a irsen intikāl etmeğin hâlâ eşyâ-i mezkûreyi vekâleten mezbûre Ayşe’den taleb ve da‘vâ eylediğimde bana redd ü teslîmden imtinâ‘ eder suâl olunup alıverilmesi murâdımdır dedikde gıbbe’s-suâl ve akībe’l-inkâr müdde‘î-i mezbûr el-Hâc Hüseyin’den sıdk-ı makālini mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müteveffiye-i mezbûre Ümmühani hayâtında bir sepet ile mahfûz eşyâ-i mezkûreyi emânet vaz‘ etmediğine mezbûre Ayşe’ye yemîn teklîf olundukda ol dahi hasbe’l-mesûl yemîn biʼllâhi’l-aliyyi’l-a‘lâ etmeğin mûcebince müdde‘î-i mezbûr el-Hâc Hüseyin bî-vech mu‘ârazadan men‘-birle mâ-vaka‘a bi’t-taleb ketb olundu. Fî 11 min-şehri Rebîʻülâhir sene 1121 Şuhûdü’l-hâl: Süleyman b. Abdullah, el-Hâc Hasan b. Mustafa, İsmail b. Mustafa, Hüseyin Efendi b. Mustafa, Ali b. el-Hâc Mahmud, Şa‘ban b. Mustafa ve gayruhum mine’l-huzzâr. .