Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 118 Hüküm no: 63 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun vakfından Karabaş Mahallesi’ndeki evde oturan Ahmed Çelebi b. Mustafa’nın oturmaktan vazgeçmesi üzerine evin Seyyid Mehmed Salih Efendi b. Seyyid Mehmed’e tahsis edildiği Merhûme Emine Hatun’un süknâsı kendiden sonra rûhiʼçün küllü yevm üçer İhlâs-ı şerîf tilâvet etmek üzere Sâliha Hatun’a ba‘dehâ İsmail ve Süleyman’a ba‘dehümâ bir recül-i sâlihe meşrûta vakfı olup mahmiye-i İstanbul’da Yenibahçe kurbünde Karabaş Mahallesi’nde vâki‘ bir tarafdan Gonca Hatun mülkü ve bir tarafdan Osman Ağa mülkü ve bir tarafdan Hadice mülkü ve bir tarafdan tarîk-i âm ile mahdûd fevkānî bir oda ve tahtânî bir oda ve cüneyneyi müştemil menzile tevcîh-i hâkimü’ş-şer‘le mutasarrıf olan Ahmed Çelebi b. Mustafa kasr-ı yed etmekle süknâ-yı menzil-i mezkûr sulehâdan işbu râfi‘u’l-kitâb es-Seyyid Mehmed Salih Efendi b. es-Seyyid Mehmed’e ber-mûceb-i şart-ı vâkıfe kıbel-i şer‘den tevcîh olunup tasarrufîçün işbu vesîka-i enîka ketb ü terkīm olunup yedine def‘ ve i‘tâ olundu. Fî 8 min-şehri Rebîʻülâhir sene 1121 Şuhûdü’l-hâl: Ahmed Efendi b. Mehmed, es-Seyyid Mehmed Çelebi b. Mehmed, Eyüb Ağa b. Mehmed, el-Hâc Mustafa Efendi, Abdullah Efendi b. Mehmed ve gayruhum mine’l-huzzâr.