Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 118 Hüküm no: 64 Orijinal metin no: [9b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Aslan v. David’in Dîvân-ı âlî çavuşlarından Mehmed Çavuş b. Hamza’da olan alacağının ödenmesi Yahud tâifesinden olup Havâss-ı Aliyye kazâsına tâbi‘ kasaba-i Hasköy’de sâkin işbu râfi‘u’s-sifr Aslan v. David nâm Yahûdi meclis-i şer‘-i şerîf-i enverde Dîvân-ı âlî çavuşlarından Mehmed Çavuş b. Hamza nâm kimesne mahzarında üzerine da‘vâ ve takrîr-i kelâm edip iklîletü’l-muhadderât tâcü’l-mestûrât devletlü sa‘âdetlü Ümmügülsüm Sultan dâmet ismetuhâ hazretlerinden cihet-i havâleden olan ma‘lûmü’l-mikdâr hakkımı tahsîl için ücret-i ma‘lûme ile bundan akdem mezbûr Mehmed Çavuş’u mübâşir ta‘yîn eylediğimden sonra mezbûr Mehmed Çavuş sultan-ı müşârun-ileyh hazretlerinden baʻde’l-ahz bana medfû‘u olan meblağdan bâkī kırk üç guruşumu kendi mesârifine istihlâk etmeğin suâl olunup meblağ-ı bâkī-i mezbûr kırk üç guruşun alıverilmesi matlûbumdur dedikde gıbbe’s-suâl mezbûr Mehmed Çavuş cevâbında fi’l-vâki‘ kaziyye bâlâda zikr olunduğu üzere olup lâkin meblağ-ı bâkī-i mezbûr kırk üç guruşu dahi kendiye def‘ ü teslîm eylemişidim deyü def‘le mukābele edicek gıbbe’l-istintak ve’l-inkâr mezbûr Mehmed Çavuş’dan def‘-i mezkûrunu mübeyyine beyyine taleb olundukda bir vechile ityân-ı beyyineye kādir olmayıp izhâr-ı acz etmekle müdde‘î-i mezbûr Aslan Yahûdiye kabzını mu‘terif olduğu meblağ-ı ma‘lûmü’l-mikdârdan bâkī kırk üç guruşu dahi merkūm Mehmed Çavuş yedinden ahz ve istîfâ etmediğine yemîn teklîf olundukda ol dahi hasbe’l-mesûl yemîn biʼllâhi’llezî enzele’t-Tevrâte alâ-Musa aleyhisselâm etmeğin mûcebince meblağ-ı bâkī kırk üç guruşu müdde‘î-i mezbûr Aslan Yahûdiye redd ü teslîme mezbûr Mehmed Çavuş’a tenbîh-birle mâ-vaka‘a bi’t-taleb ketb olundu. Fî 9 min-şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. Bâli, Hasan Çelebi b. Mustafa, Ali Çelebi b. İvaz, Hasan b. Abdullah ve gayruhum mine’l-huzzâr.