Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 119 Hüküm no: 65 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Viçnise kazasının Sagunya köyünden Hasan b. Ebûbekir’in Trabzon Valisi Hacı İvaz Paşa b. Mehmed’de olan alacağının ve hizmetçisinin kendisinin veya bedelinin ödenmesi Vilâyet-i Anadolu’da Goniye sancağında Viçnise kazâsına tâbi‘ Sagunya nâm karyeden işbu râfi‘u’l-vesîka Hasan b. Ebûbekir nâm kimesne mahfil-i kazâda sâbıkā Trabzon vâlîsi olan el-Hâc İvaz Paşa b. Mehmed mahzarında üzerine da‘vâ ve takrîr-i kelâm edip mezbûr İvaz Paşa târih-i kitâbdan on beş ay mukaddem şehr-i Zilhicce evâilinde benim bi-gayr-ı hakkın kırk guruşumu ve kıymeti beynimizde ma‘lûm sekiz yaşında bir Gürcü gulâmımı ahz u kabz etmişdir suâl olunsun dedikde gıbbe’s-suâl ve’l-inkâr ve isr-i talebü’l-beyyine udûl-i Müslimînden olup karye-i mezbûre ahâlîsinden Hasan Efendi b. Ali ve Mustafa b. Ömer nâm kimesneler li-ecli’ş-şehâde mahfil-i kazâya hâzırân olup istişhâd olunduklarında fi’l-hakīka târih-i kitâbdan on beş ay mukaddem şehr-i Zilhicce evâilinde mezbûr İvaz Paşa müdde‘î-i mezbûrun kırk guruşunu ve beynlerinde ma‘lûm sekiz yaşında bir Gürcü gulâmını bizim huzûrumuzda bi-gayr-ı hakkın ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince baʻde’l-hükm meblağ-ı mezbûr kırk guruşu ve mârru’z--zikr gulâmın mevcûd ise aynını müstehlek ise ba‘de’s-sübût kıymet-i şer‘iyyesini müdde‘î-i mezbûra edâya paşa-yı merkūma tenbîh-birle mâ-vaka‘a bi’t-taleb ketb olundu. Fî 3 min-şehri Rebîʻülâhir sene 1121 Şuhûdü’l-hâl: el-Hâc Mustafa Efendi b. ( ), el-Hâc Mustafa Çelebi b. ( ), el-Hâc Hüseyin Beşe Çukadâr, Süleyman Çelebi b. ( ) ve gayruhum mine’l-huzzâr.