Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 123 Hüküm no: 71 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun bt. Salih’in kocası Hasan Çelebi b. Abdullah’dan boşandığı Mahmiye-i İstanbul’da Arablar Mahallesi sâkinelerinden olup zâtı ma‘rifet-i şer‘iyye ile ârifân İbrahim Çelebi b. Abdullah ve Abdülbâki Çelebi b. Abdülaziz nâm kimesneler ta‘rîfleriyle mu‘arrefe olan Hadice bt. Salih nâm hatun meclis-i şer‘-i şerîf-i enverde zevc-i gayr-ı dâhili işbu râfi‘u’l-kitâb Hasan Çelebi b. Abdullah nâm kimesne muvâcehesinde ikrâr ve takrîr-i kelâm edip mezkûr Hasan Çelebi altı bin akçe mehr-i müeccel tesmiyesiyle zevcim olup lâkin beynimizde duhûl ve halvet-i sahîha bulunmamağla lâzım gelen üç bin akçe mehr-i müeccelim üzerine zevcim mezkûr Hasan Çelebi ile muhâla‘a-i sahîha-i şer‘iyye ile muhâla‘a edip ol dahi ber-vech-i muharrer hul‘-ı mezkûru kabûl eylediğinden sonra hukūk-ı zevciyete müte‘allika âmme-i da‘vâ ve kâffe-i mutâlebâtdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik baʻde’l-yevm her birimiz âhar ile da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 14 min-Rebîʻülâhir sene 1121 Şuhûdü’l-hâl: İsmail Çavuş b. Abdullah an-silâhdârân, Derviş Mehmed Çelebi b. Ali, İbrahim Çelebi b. Abdullah, Abdülbâki Çelebi b. Abdülaziz, Ali b. İvaz, Mustafa Çelebi b. Şa‘ban, Ali b. Abdullah ve gayruhum mine’l-huzzâr.