Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 124 Hüküm no: 72 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kreki v. Hataryani’nin bogası ve astar bedellerinden Kabril v. Haçik’de olan alacağının ödenmesi Mahmiye-i İstanbul’da Kebeciler Hanı’nda sâkin olup bundan akdem Kuds-i şerîf’e âzim olan işbu bâ‘isü’s-sifr Kreki v. Hataryani nâm zimmînin şerîki ve tarafından husûs-ı âti’z-zikre vekîl olduğu diğer Kreki v. İsak ve Yorgi v. Pars nâm zimmîler şehâdetleriyle şer‘an sâbit olan Palu v. Yani nâm zimmî meclis-i şer‘-i şerîf-i enverde Kabril v. Haçok nâm zimmî muvâcehesinde üzerine da‘vâ ve takrîr-i kelâm [edip] bundan akdem yedinden iştirâ ve kabz eylediği beynlerinde levn ve zirâ‘ı ma‘lûm bogası ve astar bahâlarından müvekkilim mezbûr Kreki’nin merkūm Kabril zimmetinde yedi yüz yetmiş beş akçe hakkı olup hâlâ meblağ-ı mezbûru bi’l-vekâle mezbûr Kabril’den taleb ve da‘vâ eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Kabril cevâbında ber-vech-i muharrer zikri mürûr eden bogası ve astar bahâlarından meblağ-ı mezbûr yedi yüz yetmiş beş akçe müvekkil-i mezbûr Kreki’ye deyni olduğunu lâkin meblağ-ı mezbûrdan dört yüz yetmiş beş akçesini bundan akdem müvekkil-i mezbûr Kreki’ye def‘ ü teslîm ol dahi yedimden ahz u kabz edip zimmetimde müvekkil-i mezbûr Kreki’ye üç yüz akçe deynim bâkī kaldı deyü def‘le mukābele edicek gıbbe’l-istintak ve akībe’l-inkâr mezbûr Kabril’den def‘-i mezkûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin vekîl-i mezbûra yemîn tevcîh etmeyip mevkūfen alâ-yemîni’l-müvekkil meblağ-ı mezbûr yedi yüz yetmiş beş akçeyi vekîl-i mezbûr Palu’ya edâ ve teslîme mezbûr Kabril’e tenbîh olunup mâ-vaka‘a bi’t-taleb ketb olundu. Fî 28 şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Ahmed b. Mehmed, Mehmed b. Ahmed, Ali Çelebi b. İvaz, Hasan b. Abdullah, Süleyman b. Abdullah ve gayruhum mine’l-huzzâr.