Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 125 Hüküm no: 73 Orijinal metin no: [10b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun bt. Hüseyin’in boşandığı kocası İsmail Beşe b. Mehmed’de mehir bedeli ve alacağı olan parayı taksitler halinde ödenmesini kabul ettiği Mahmiye-i İstanbul’da Karabaş Mahallesi’nde sâkine işbu râfi‘atü’l-kitâb Havvâ bt. Hüseyin nâm hatun meclis-i şer‘-i şerîf-i enverde zevc-i sâbıkı İsmail Beşe b. Mehmed nâm kimesne mahzarında ikrâr ve takrîr-i kelâm edip mezbûr İsmail Beşe zevcim olup beni bâyinen tatlîk etmekle zimmetinde mütekarrer ve ma‘kūdün-aleyh olan sekiz yüz akçe mehr-i müeccelim ve bin iki yüz akçe dahi cihet-i deyn-i şer‘îden ki cem‘an iki bin akçe hakkım olmağla meblağ-ı mezbûru mezbûr İsmail Beşe’den taleb ve da‘vâ ettiğimde hâlâ edâya kudreti olmayıp te’cîl ve taksîte tâlib olduğundan ben dahi meblağ-ı mezbûru her otuz gün tamamında bana yüz yirmişer akçe vermek üzere târih-i kitâbdan on yedi ay tamamına değin te’cîl ve taksît eylediğimde ol dahi kabûl ve meblağ-ı mezkûru ber-vech-i muharrer edâya ta‘ahhüd eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 14 min-şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Mehmed Ağa Kethüdâ-yı muhzırân, Ali b. Bâli, Ali b. İvaz, Hasan b. Hüseyin.