Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 125 Hüküm no: 74 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Sima’nın bilezik bedelinden Foti bt. Yanaki’ye olan borcunu taksitler halinde ödeyeceği Mahmiye-i İstanbul’da Balat kurbünde sâkine Maryem bt. Sima nâm Nasrâniye meclis-i şer‘-i şerîf-i enverde işbu bâ‘isü’s-sifr Foti v. Yanaki nâm Nasrâniye muvâcehesinde ikrâr ve takrîr-i kelâm edip bundan akdem mezbûr Foti yedinden iştirâ ve kabz eylediğim vezni beynimizde ma‘lûm altın bilezik semeninden ba‘de külli hesâb yirmi sekiz guruş deynim olup meblağ-ı mezbûru hâlâ ve def‘aten edâya iktidârım olmamağla taksîte ve te’cîle tâlibe ve râgıbe olduğumda meblağ-ı mezbûrdan her otuz gün tamamında kendiye yirmişer para verip târih-i kitâbdan elli altı ay tamamına değin kendiye tamamen edâ ve teslîm etmek üzere beni te’cîl ve taksît eyledikde ben dahi ber-minvâl-i muharrer te’cîl ve taksîti kabûl ve meblağ-ı mezkûru ber-vech-i muharrer mezbûre Foti’ye edâya ta‘ahhüd eyledim hâlâ meblağ-ı mezbûr merkūme Foti’ye müeccel ve mukassat deynimdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-şehri Rebîʻülâhir sene 1121 Şuhûdü’l-hâl: Mustafa b. Şa‘ban, Ali b. İvaz, Abdullah b. Abdullah, Ali b. Bâli ve gayruhum mine’l-huzzâr.