Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 128 Hüküm no: 79 Orijinal metin no: [11a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Hristo v. Todori’nin Baroş v. Lambo’da olan alacak davasında sulh yoluyla anlaştığı parayı taksitler halinde alacağı Bakkāl tâifesinden işbu râfi‘u’s-sifr Hristo v. Todori nâm zimmî mahfil-i kazâda Baros[ş] v. Lambo nâm zimmî muvâcehesinde ikrâr ve takrîr-i kelâm edip bundan akdem mezbûr Baros[ş] yedimden iştirâ ve kabz eylediği beynimizde ma‘lûm bakkal metâ‘ı semeninden sekiz bin sekiz yüz akçe hakkım vardır deyü mezbûr Baroş’dan taleb ve da‘vâ sadedinde olduğumda ol dahi inkâr etmekle beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip mezbûr Baroş ile beni da‘vâ-yı mezkûremden beş bin akçe üzerine sulh eylediklerinde ben dahi sulh-ı mezbûr[u] kabûl ve bedel-i sulh olan meblağ-ı mezbûr beş bin akçe bana hâlâ ve def‘aten edâya iktidârı olmayıp te’cîl ve taksîte tâlib ve râgıb olduğunda meblağ-ı mezkûrdan her otuz gün tamamında birer guruş verip târih-i kitâbdan kırk iki ay ve on gün tamamına değin tamamen edâ ve teslîm etmek üzere te’cîl ve taksît eylediğimde ol dahi kabûl ve meblağ-ı mezkûru ber-vech-i muharrer bana edâya ta‘ahhüd eylediğinden sonra meblağ-ı mezbûr beş bin akçeden mâ‘adâsı olan üç bin sekiz yüz akçeye müte‘allika da‘vâdan merkūm Baroş’un zimmetini ibrâ ve iskāt eyledim ol dahi kezâlik benden iddi‘â eylediği beynimizde ma‘lûm üç senelik ücrete müte‘allika [11b] da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 min-şehri Rebîʻülâhir sene 1121 Şuhûdü’l-hâl: Mustafa b. Şa‘ban, Ebûbekir b. İbrahim Halîfe, Yahya Efendi b. Mustafa, Berber Ahmed Çelebi b. Mustafa, Mehmed el-Mübâşir, Mehmed Çelebi b. ( ).