Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 128 Hüküm no: 80 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aritun v. Avanis’in Sabatula bt. David’de kalan alacağının ödenmesi Acem tâifesinden işbu râfi‘u’s-sifr Aritun v. Avanis nâm zimmî mahfil-i kazâda Sabatula bt. David nâm Yahûdiye muvâcehesinde üzerine da‘vâ ve takrîr-i kelâm edip mezbûre Sabatula zimmetinde yedimden iştirâ ve kabz eylediği beynimizde ma‘lûm Acem metâ‘ı bahâsından altmış bir guruş hakkım olup meblağ-ı mezbûrun on beş guruşunu bana def‘ ü teslîm ben dahi baʻde’l-ahz elli bir guruşunu bana def‘ ü teslîm ben dahi baʻde’l-ahz elli bir guruş zimmetinde bâkī kalmağla meblağ-ı bâkī-i mezbûru taleb ve da‘vâ eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûre Sabatula cevâbında fi’l-vâki‘ cihet-i mezbûre[den] altmış bir guruş deynim olup meblağ-ı mezbûrun kırk guruşu mukābelesinden kendide rehnim olan iki sûzenî mak‘adı müdde‘î-i mezbûra kırk guruşa bey‘ eylediğimde ol dahi kabûl ve semeni olan kırk guruşu deyn-i mezbûrun ol mikdârına takās ve merkūm Aritun dahi mukāssa ve kabûl edip ancak müdde‘î-i mezbûra yirmi guruş deynim bâkī kalmışidi deyü müdde‘î-i mezbûrun baʻzı müdde‘âsını inkâr ve baʻzı müdde‘âsını def‘le mukābele edicek gıbbe’l-istintak ve’l-inkâr mezbûre Sabatula def‘ini beyâna istimhâl etmekle baʻde’l-imhâl müdde‘î-i mezbûrdan ziyâde müdde‘âsını mübeyyine beyyine taleb olundukda mezbûrenin zâtını ma‘rifet-i şer‘iyye ile ârifân Vezîr Hanı’nda müsâfiren sâkin Kostantin v. Bedros ve Ayar v. Semaven nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mezbûre Sabatula beynlerinde ma‘lûm Acem metâ‘ı bahâsından merkūm Aritun’a zimmetimde altmış bir guruş deynim vardır deyü bizim huzûrumuzda ikrâr ve on beş guruşunu edâ eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mezbûr Aritun’un kabzını mu‘terif olduğu on beş guruşdan mâ‘adâ kırk altı guruşu müdde‘î-i mezbûra edâya mezbûre Sabatula’ya tenbîh-birle mâ-vaka‘a bi’t-taleb ketb olundu. Fî 8 min-şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa, Osman b. Hasan ve gayruhum mine’l-huzzâr.