Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 129 Hüküm no: 81 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hüseyin b. Abdullah’ın Şa‘ban b. Sefer’e emanet bıraktığı iki sandığın vekili olan kocası Kadı Mehmed Efendi b. Musa’ya teslim edilmesi Mahmiye-i İstanbul’da Hoca Kasım Gönânî Mahallesi’nde sâkine Fâtıma bt. Hüseyin b. Abdullah’ın zevci ve tarafından husûs-ı âti’l-beyâna vekâlet iddi‘â eden Malatya’dan ma‘zûl Kādı Mehmed Efendi b. Musa nâm kimesne mahfil-i kazâda Süleymâniye Câmi‘-i şerîfi’nde kayyûmbaşı olan Şa‘ban b. Sefer mahzarında takrîr-i da‘vâ ve tasvîr-i müdde‘â edip zevcem müvekkilem mezbûre bundan akdem Molla Yusuf yediyle iki mukaffel beynlerinde ma‘lûm memhûr sandığını mezbûr Şa‘ban’a îdâ‘ ve teslîm ol dahi istîdʻâ ve kabz edip hâlâ mezbûre Fâtıma mârru’z--zikr sandıkları mezbûr Şa‘ban Halîfe’den taleb ve da‘vâ ve ahz u kabza ve kendiye îsâle beni vekîl ben dahi kabûl etmekle suâl olunup zikr olunan iki memhûr sandığı bana teslîme tenbîh olunmak matlûbumdur dedikde mezkûr Şa‘ban Halîfe cevâbında kaziyye minvâl-i muharrer üzere olduğunu ikrâr lâkin müdde‘î-i mezbûrun vekâletini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahalle-i mezbûrede bekçi olan Mehmed b. Mustafa ve Sefer b. İbrahim nâm kimesneler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka mezbûre Fâtıma bt. Hüseyin b. Abdullah mezkûr Şa‘ban Halîfe’den mârru’z--zikr iki mukaffel memhûr sandığını da‘vâ ve ahz u kabza ve kendiye îsâle tarafından Malatya’dan ma‘zûl işbu zevci mûmâ-ileyh Mehmed Efendi’yi bizim huzûrumuzda vekîl edip ol dahi vekâlet-i mersûmeyi kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince müdde‘î-i mezbûrun ber-vech-i muharrer vekâletine baʻde’l-hükm sâlifü’z-zikr iki memhûr sandığı vekîl-i mezbûra teslîme mezbûr Şa‘ban Halîfe’ye tenbîh-birle mâ-vaka‘a bi’t-taleb ketb olundu. Fî muntasıfı şehri Rebîʻülâhir sene 1121 Şuhûdü’l-hâl: Mehmed Efendi el-Kâtib, el-Hâc Hüseyin Beşe Çukadâr, el-Hâc Mustafa Efendi Kethüdâ-yı efendi, el-Hâc Mehmed Beşe b. Hüseyin Çukadâr-ı efendi, Mehmed Çelebi b. ( ) ve gayruhum mine’l-huzzâr.