Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 130 Hüküm no: 82 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamer Hatun ile kocası Osman Bey’in vakfının mütevellîsi Ali Ağa b. Muslihiddin’in kendisine yardım etmek üzere Hüseyin Efendi b. Hacı Mehmed’i vekil ve nâib tayin ettiği Ashâb-ı hayrâtdan merhûme Kamer Hatun ile zevci merhûm Osman Bey’in evlâdiyet ve meşrûtiyet üzere evkāfı mütevellîsi olan fahrü’l-akrân Ali Ağa b. Muslihiddin nâm kimesne meclis-i şer‘-i şerîf-i enverde işbu râfi‘u’l-kitâb Hüseyin Efendi b. el-Hâc Mehmed nâm kimesne mahzarında ikrâr-ı tâm ve takrîr-i kelâm edip ben evkāf-ı mezbûrenin ber-mûceb-i vakfiye-i ma‘mûlün-bihâ evlâdiyet ve meşrûtiyet üzere mütevellîsi olup umûr-ı tevliyeti ikāmete kudretim olmayıp aczim olmağla tarafımdan evkāf-ı mezbûrenin umûrunu rü’yet ve ikāmete yevmî iki akçe ile mezbûr Hüseyin Efendi’yi vekîl ve dahi nâib-i menâb nasb u ta‘yîn eylediğimde ol dahi minvâl-i muharrer üzere vekâlet-i mezbûreyi kabûl ve kemâ-yenbagī hizmet-i lâzımesini edâya ta‘ahhüd ve iltizâm eyledi dedikte gıbbe’t-tasdîkı’ş-şer‘î ve’t-tahkīki’l-vicâhî mâ-hüve’l-vâki‘ bi’t-taleb ketb olundu. Fî 15 min-şehri Rebîʻülâhir sene 1121 Şuhûdü’l-hâl: Fahrü’l-kuzât Abdullah Efendi b. el-Hâc Mehmed Efendi, Umdetü’l-meşâyih eş-Şeyh Mehmed Efendi, Mahmud Çelebi b. Bayram, Ömer b. Mehmed, Mehmed Çelebi b. Abdullah, Mehmed Efendi b. Abdullah el-İmâm, el-Hâc Hüseyin b. Ahmed Nâzır-ı vakf-ı mezbûr, Monla Ömer b. Abdullah, Benli Mustafa Çelebi el-Muhzır, Mustafa Çelebi b. Şa‘ban, Süleyman b. Abdullah, İbrahim Çelebi b. Ahmed ve gayruhum mine’l-huzzâr.