Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 131 Hüküm no: 83 Orijinal metin no: [11b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadim kadısı Ahmed Efendi b. Mustafa’nın evini Ahmed Çavuş ve Aynî Hatun vakıflarına istiğlal yoluyla satıp tekrar mütevellîsi Süleyman Efendi b. Murtaza’dan kiraladığı Hâlâ Hadim kādısı olup mahmiye-i İstanbul’da Altıpoğaça Mahallesi’nde sâkin Ahmed Efendi b. Mustafa nâm kimesne meclis-i şer‘-i şerîf-i enverde mahmiye-i mezbûrede merhûm Ahmed Çavuş ve merhûme Aynî Hatun vakıflarına bi’l-fi‘il mütevellî olan hâfızu hâze’l-kitâb Süleyman Efendi b. Murtaza nâm kimesne mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Kirli Hanım veresesi ve bir tarafdan Uzunzâde kızı mülkleri ve bir tarafdan Solak bahçesi ve bir tarafdan baʻzan Karaköy odaları ve baʻzan tarîk-i hâs ile mahdûd hâricen ve dâhilen büyût-ı adîdeyi müştemil mülk menzilimi cümle tevâbi‘i ile mütevellî merkūm Süleyman Efendi’ye [12a] bi-tarîkı’l-istiğlâl dokuz yüz guruşa bey‘ ve teslîm ol dahi vakfeyn-i mezbûreyn mâllarıyla bi’t-tevliye iştirâ ve kabûl ve tesellüm edip semeni olan meblağ-ı mezbûrun beş yüz guruşu mukaddemâ dört yüz guruşunu hâlâ vakfeyn-i mezbûreyn mâllarından cem‘an dokuz yüz guruşu mütevellî-i merkūm yedinden tamamen ahz u kabz eylediğimden sonra mütevellî-i merkūm menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î beher sene doksanar guruş olmak üzere târih-i kitâbdan iki sene tamamına değin yüz seksen guruşa bana îcâr ve teslîm ben dahi istîcâr ve kabûl ve tesellüm eyledim dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fî 15 min-şehri Rebîʻülâhir sene 1121 Şuhûdü’l-hâl: Mehmed Ağa Kethüdâ-yı muhzırân, Mehmed Ağa b. Ali, Mehmed Efendi el-İmâm-ı Câmi‘-i Ali Paşa, Sinan Efendi Müezzin-i Altıpoğaça, Receb b. Süleyman, Mustafa Çelebi b. Şa‘ban, Ali Çelebi b. İvaz, Hasan b. Mustafa Muhzır ve gayruhum mine’l-huzzâr.