Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 131 Hüküm no: 84 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Yusuf’un talebiyle boşandığı kocasının ödemesi şartıyla çocukları Rukiye’ye nafaka tayin edildiği Mahmiye-i İstanbul’da Karabaş Mahallesi’nde sâkine zâtı ta‘rîf-i şer‘î ile mu‘arrefe olan işbu râfi‘atü’l-kitâb Ümmühan[i] bt. Yusuf nâm hatun mahfil-i kazâda takrîr-i kelâm ve tâʻbir ani’l-merâm edip zevcim mezbûrun firâşından hâsıla ve benden mütevellide bi-hakkı’l-hıdâne hacr ve terbiyemde olan işbu sadriye kızım Rukiye nâm sagīre için kıbel-i şer‘den babası merkūm üzerine nafaka-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri tarafeynin rızâlarıyla sagīre-i mezbûre için babası merkūm üzerine târih-i kitâbdan beher yevm dörder akçe nafaka-bahâ farz ve takdîr edip meblağ-ı mefrûz-ı mezkûru sagīr-i mezbûrenin ancak nafaka-bahâsına harc u sarfa ve lede’l-iktizâ istidâneye ve inde’z-zafer babası mezbûr üzerine rücû‘a mezbûre Ümmühani Hatun’a izin vermeğin mâ-vaka‘a bi’t-taleb ketb olundu. Fî 16 min-şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. Bâli, Hasan Çelebi b. Mustafa, Ali Çelebi b. İvaz ve gayruhum mine’l-huzzâr.