Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 132 Hüküm no: 85 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi bt. Anderya v. Kosta’nın geçinemediği kocası Todori v. Yani ile boşandıkları Mahmiye-i İstanbul’da Abdi Subaşı Mahallesi sâkinelerinden Yamandi bt. Anderya v. Kosta nâm Nasrâniye tarafından husûs-ı âti’l-beyânı ikrâra vekîl olduğu şahs-ı mezbûreyi ma‘rifet-i şer‘iyye ile ârifân Dimitri v. Yako ve Melkon v. Avanis nâm zimmîler şehâdetleriyle şer‘an sâbit olan Kostantin v. Petro nâm zimmî mahfil-i kazâda müvekkile-i mezbûrenin zevc-i dâhili işbu râfi‘u’s-sifr Todori v. Yani nâm zimmî muvâcehesinde bi’l-vekâle ikrâr ve takrîr-i kelâm edip müvekkile-i mezbûre Yamandi zevci merkūm Todori ile beynlerinde hüsn-i mu‘âşeretleri olmamağla zimmetinde mütekarrer ve ma‘kūdün-aleyh olan bin akçe mehr-i müecceli üzerine ve merkūm Todori’nin firâşından hâsıla ve müvekkilem mezbûre Yamandi’den mütevellide sadriye kızı Dominice nâm sagīreyi hakk-ı hıdâne sukūtuna değin kendi mâlından infâk ve iksâ eylemek üzere zevci merkūm Todori ile muhâla‘a-i sahîha-i şer‘iyye ile hul‘ olduğunda ol dahi ber-vech-i muharrer hul‘-ı mezbûru kabûl eyledikden sonra hukūk-ı zevciyete müte‘allika âmme-i da‘vâdan müvekkilem mezbûre Yamandi zevci merkūm Todori’nin zimmetini ibrâ-i âmm-ı kātı‘u’n-nizâ‘la ibrâ ve iskāt edip kezâlik merkūm Todori dahi hukūk-ı zevciyete müte‘allika âmme-i da‘vâdan müvekkilem mezbûre Yamandi’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 13 min-şehri Rebîʻülâhir sene 1121 Şuhûdü’l-hâl: Mehmed Çelebi b. Abdürrezzak, diğer Mehmed Çelebi b. Osman, Pazarcı Ali Çelebi, el-Hâc Mehmed b. Mustafa ve gayruhum mine’l-huzzâr.