Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 133 Hüküm no: 86 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Ali’nin alacağı olduğu iddiasıyla Sâliha Hatun bt. Mehmed’e açtığı davayı ispat edemediği Kasaba-i Tophâne’de Çukur Mahallesi’nde sâkine râfi‘atü’l-vesîka Fâtıma bt. Ali nâm hatun mahfil-i kazâ da Sâliha bt. Mehmed nâm hatun mahzarında üzerine da‘vâ ve takrîr-i kelâm edip mezbûre Sâliha zimmetinde cihet-i karzdan otuz guruş ve bir tuğralı altın hakkım olmağla suâl olunup alıverilmesi matlûbumdur dedikde gıbbe’s-suâl mezbûre Sâliha cevâbında kaziyye minvâl-i muharrer üzere olup lâkin meblağ-ı mezkûru bundan akdem müdde‘iye-i mezbûreye edâ ve teslîm ol dahi ahz u kabz etmekle meblağ-ı mezbûr mutâlebesinden zimmetim berî olmuşdur deyü def‘le mukābele edicek isre’l-istintak ve’l-inkâr mezkûre Sâliha’dan def‘-i mezkûruna beyyine taleb olundukda udûl-i Müslimînden olup kasaba-i mezkûrede Sakabaşı Mahallesi’nde sâkin Abdurrahim b. Hüseyin ve Müezzin Abdullah Çelebi b. İbrahim nâm kimesneler li-ecli’ş-şehâde <> mahfil-i kazâya hâzırân olup isre’l-istişhâd fi’l-hakīka işbu mezbûre Sâliha Hatun müdde‘iye-i mezkûre Fâtıma’ya cihet-i mezkûreden deyni olan meblağ-ı mezbûr otuz esedî guruşu ve bir tuğralı altını bizim huzûrumuzda bundan akdem edâ ve teslîm mezbûre Fâtıma dahi ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘iye-i mezbûre Fâtıma bî-vech mu‘ârazadan men‘-birle mâ-vaka‘a bi’t-taleb ketb olundu. Fî 8 min-şehri Rebîʻülâhir sene 1121 Şuhûdü’l-hâl: el-Hâc Mehmed Efendi, el-Hâc Mustafa Efendi tâbi‘-i efendi, Hüseyin Beşe Çukadâr, Mustafa Çelebi b. ( ) ve gayruhum mine’l-huzzâr.