Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 133 Hüküm no: 87 Orijinal metin no: [12a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakat ve hasta olan Elveda Hatun bt. Ahmed’e oğlu İbrahim b. Ali’nin ödemesi şartıyla nafaka tayin edildiği Mahmiye-i İstanbul’da Ayvansaray dâhilinde Koca Mustafa Paşa-yı Atîk Mahallesi sâkinelerinden işbu râfi‘atü’l-kitâb Elveda bt. Ahmed nâm hatun meclis-i şer‘-i şerîf-i enverde sadrî kebîr oğlu İbrahim b. Ali muvâcehesinde takrîr-i kelâm ve tâʻbir ani’l-merâm edip ben alîl ve marîz ve fakīretü’l-hâl olup nafaka ve kisveye zarûret ve ihtiyâcım olmağla işbu oğlum mezbûr İbrahim üzerine kıbel-i şer‘den kadr-i ma‘rûf nafaka ve kisve-bahâ farz ve takdîr olunmak murâdımdır dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri mezbûre Elveda Hatun’un nafaka ve kisve ve sâir mesârif-i lâzımesiʼçün oğlu mezbûr İbrahim üzerine kıbel-i şer‘-i mergūbdan beher yevm dörder akçe farz ve takdîr edip meblağ-ı mefrûz-ı mezkûru mezbûre Elveda Hatun nafaka ve kisve ve sâir mesârif-i lâzımesine harc u sarfa ve hîn-i zarûretde istidâneye ve lede’z-zafer oğlu mezbûr İbrahim üzerine rücû‘a mezbûre Elveda Hatun’a izin vermeğin mâ-vaka‘a bi’t-taleb ketb olundu. Fî 17 min-şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Mustafa Efendi Gaybîzâde, Süleyman b. Abdullah, Hasan Çelebi b. Abdullah, Fazlullah Efendi b. Abdullah, Ali Beşe b. Bâli, Ali Çelebi [b.] İvaz, Abdullah b. Abdurrahim, Ahmed Beşe b. Abdullah, Molla Osman b. Mustafa, Mustafa Çelebi b. Abdulkādir, Ahmed Beşe b. Mahmud ve gayruhum mine’l-huzzâr.