Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 134 Hüküm no: 88 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa b. Yusuf’un Ayaş’daki bağını Hacı Ali b. İbrahim’e sattığı Dârü’l-hilâfeti’l-aliyye Kostantıniyyeti’l-mahmiye mahallâtından Murad Paşa-yı Atîk Mahallesi’nde sâkin Mahmud Ağa b. Yusuf nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda işbu sâhibü’l-kitâb el-Hâc Ali b. İbrahim nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden olup vilâyet-i Anadolu’da Ankara sancağında Ayaş kasabası bağları dâhilinde vâki‘ Kamam bağı demekle ma‘rûf bir tarafdan Vâ‘iz el-Hâc Hasan Efendi bağı ve bir tarafdan Saka Süleyman bağı ve bir tarafdan demirci Yusuf bağı ve bir tarafdan Hüseyin Dede bağı ile mahdûd tahmînen on ırgādlık bağımı tarafeynden îcâb ve kabûlü hâvî ârî bey‘-i bâtt-ı sahîh-i şer‘î ile yetmiş guruşa mezbûr el-Hâc Ali’ye bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yetmiş guruşu merkūm el-Hâc Ali yedinden tamamen ahz u kabz edip bağ-ı mahdûd-ı mezkûru mahallinde zabt ve tasarrufa mezbûr el-Hâc Ali’yi taslît eyledim fîmâ-ba‘d zikri mürûr eden bağ bi’l-cümle müştemilâtıyla mezbûr el-Hâc Ali’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-şehri Rebîʻülâhir sene 1121 Şuhûdü’l-hâl: el-Hâc Mahmud b. el-Hâc Mustafa, Abdülkerim b. Ahmed Çelebi, es-Seyyid Mehmed Çelebi b. el-Hâc Şa‘ban, Mustafa Çelebi b. Şa‘ban, Hasan b. Abdullah, el-Hâc İdris b. Abdullah, Süleyman b. Abdullah, Ali Çelebi b. İvaz, Abdullah Çelebi b. Abdurrahman, Ali b. Bâli, es-Seyyid Osman Efendi b. el-Hâc Yusuf ve gayruhum mine’l-huzzâr.