Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 135 Hüküm no: 89 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Mehmed’in Taşköprü’nün Atdoğan köyünde bulunan değirmeninin zaptına mani olduğu iddiasıyla Abdülgaffar Efendi b. İbrahim Efendi ile sulh oldukları Vilâyet-i Anadolu’da Taşköprü-i Güney kazâsına tâbi‘ Atdoğan nâm karye ahâlîsinden olup mahmiye-i İstanbul’da Edirnekapısı dâhilinde müsâferet vechi üzere sâkin Mustafa Beşe b. Mehmed nâm kimesne mahfil-i kazâda işbu râfi‘u’l-kitâb fahrü’l-kuzât Abdülgaffar Efendi b. İbrahim Efendi mahzarında ikrâr ve takrîr-i kelâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk Paşa Çiftliği demekle ma‘rûf çiftlik kurbünde vâki‘ Alama nehri üzerinde dâir iki bâb mülk değirmeni kendi mâlım ile babam müteveffâ-i mezbûr bana iştirâ ediverip mülk-i müşterâm olmuş iken sen fuzûlî bi-gayr-ı hakkın zabt u tasarruf edersin deyü da‘vâ ol dahi mülk olduğunu inkâr etmekle beynimizde münâza‘ât-ı kesîre ve muhâsamât-ı ekîde cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni mezbûr Abdülgaffar Efendi ile on guruş kıymetli bir çepre? sarık ve bir guruş kıymetli bir kavuk üzerlerine sulh eylediklerinde ben dahi sulh-ı mezbûru kabûl ve bedel-i sulh olan mârru’z--zikr sarık ve kavuğu mezbûr Abdülgaffar Efendi yedinden ahz u kabz edip husûs-ı mezbûra müte‘allika âmme-i de‘âvî ve mutâlebât ve eymân ve muhâsamâtdan mezbûr Abdülgaffar Efendi’nin zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 min-şehri Rebîʻülâhir sene 1121 Şuhûdü’l-hâl: Mehmed Efendi b. Mustafa, Şa‘ban b. Mehmed, Abdurrahman Çavuş b. Mehmed, Mehmed Çavuş b. Mustafa ve gayruhum mine’l-huzzâr.