Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 135 Hüküm no: 90 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Ali Efendi b. Mehmed’in Bolu’da Hurcus ve Çukurviran köylerindeki tarla bahçe, ev yeri ve diğer mülklerini Süleyman Efendi b. Hasan’a sattığı Fi’l-asl vilâyet-i Anadolu’da Bolu sancağında Çarşambabolu kazâsına tâbi‘ Hurcus nâm karye ahâlîsinden olup hacc-ı şerîfe gitmek üzere mahmiye-i İstanbul’da Çerâğī Hamza Mahallesi’nde müsâfiren sâkin fahrü’l-kuzât Ali Efendi b. Mehmed nâm kimesne meclis-i şer‘-i şerîf-i enverde işbu râfi‘u’l-kitâb Süleyman Efendi b. Hasan nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup karye-i mezbûrede vâki‘ lede’l-ahâlî ve’l-cîrân ma‘lûm İsa Beşe’nin babası Resul’den ve ammisi Ali’den mezbûr İsa Beşe’ye isâbet ve intikāl edip ondan ben semen-i ma‘lûma iştirâ eylediğim eşcâr-ı müsmire ve gayr-ı müsmireli bahçe ve menzil yeri ve dam ve samanhâne yerlerin tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Süleyman Efendi’ye bi-safkatin vâhidetin on beş guruşa bey‘ ve temlîk ve karye-i mezbûrede vâki‘ ve Çukurviran nâm karyede vâki‘ kezâlik lede’l-ahâlî ve’l-cîrân ma‘lûm ve Çukurviran nâm karyede vâki‘ kezâlik lede’l-ahâlî ve’l-cîrân ma‘lûmü’l-hudûd tarlalarımı dahi bâ-ma‘rifet-i sâhib-i arz altmış beş guruş bedel mukābelesinde ferağ-ı kat‘î ile ferağ ve tefvîz eylediğimde ol dahi ber-vech-i muharrer iştirâ ve temellük ve tefevvüz ve kabûl eylediğinden sonra semen-i mezbûr on beş guruş ile bedel-i merkūm altmış beş guruşu mezbûr Süleyman Efendi yedinden tamamen ahz u kabz eyledim baʻde’l-yevm mârru’z--zikr bahçe ve menzil yeri ve dam ve samanhâne yerleri mülk-i müşterâsı ve tarlalar dahi hakk-ı müfevvazı olup her birini mahallinde zabt u tasarrufa mezbûr Süleyman Efendi’yi taslît eyledim keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-şehri Rebîʻülâhir sene 1121 Şuhûdü’l-hâl: Abdulkādir Efendi b. Mehmed, Ali Efendi b. Mustafa, Mustafa Efendi b. Mehmed, Resul Efendi b. Yusuf, İbrahim Efendi b. Hasan, İsmail Efendi b. Osman Efendi, Mustafa b. Ahmed, Mustafa b. Şa‘ban ve gayruhum mine’l-huzzâr.