Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 136 Hüküm no: 91 Orijinal metin no: [12b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Receb’in Ayşe bt. Mehmed’den satın aldığı Zenci köle Meryem’in bedeli ile aldığı borca Fâtıma’nın kocası Ahmed Çelebi b. Ali’nin kefil olduğu Mahmiye-i İstanbul’da Hoca Hayreddin Mahallesi’nde sâkine zâtı Mustafa Çelebi b. Şa‘ban ve Ali Çelebi b. Bâli ta‘rîfleriyle mu‘arrefe olan Fâtıma bt. Receb nâm hatun mahfil-i kazâda işbu râfi‘atü’l-vesîka Âişe bt. Mehmed nâm hatunun zevci ve tarafından husûs-ı âti’l-beyânı tasdîka vekîl-i müsecceli olan Hasan Beşe b. Mustafa nâm kimesne mahzarında ikrâr ve takrîr-i kelâm edip semeni târih-i kitâbdan doksan bir gün tamamına değin mev‘ûd ve müeccel olmak üzere müvekkile-i mezbûre Âişe yedinden iştirâ ve kabz eylediğim işbu uzun boylu açık kaşlı kara gözlü Zenciyyetü’l-asl Müslimetü’l-mille Meryem bt. Abdullah nâm câriyeyi gözlerinin dumanı ve cemî‘ uyûbu ile seksen beş guruşa bana bey‘ ben dahi yedinden baʻde’l-iştirâ semen-i mezbûr ile müvekkile-i mezbûreye deynim olan elli beş guruş ki cem‘an yüz kırk guruş müvekkile-i mezbûre Ayşe’ye ecel-i mezkûr hulûlünde zimmetinde vâcibü’l-edâ ve lâzımü’l-kazâ deynimdir dedikden sonra mezbûre Fâtıma’nın zevci Ahmed Çelebi b. Ali meclis-i mezkûrda vekîl-i merkūm mahzarında ikrâr ve takrîr-i kelâm edip meblağ-ı mecmû‘-ı mezkûr yüz kırk guruşu tarafeynden emr ve kabûlü hâviye kefâlet-i sahîha-i şer‘iyye ile ben dahi kefîl oldum dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 min-şehri Rebîʻülâhir sene 1121 Şuhûdü’l-hâl: Mustafa Çelebi b. Hasan, Ali Çelebi b. Bâli, Hasan Çelebi b. Mustafa, Osman b. Hasan, Ali Çelebi b. İvaz, Abdullah b. Abdullah, Süleyman b. Abdullah, Abdullah b. Mustafa, Hüseyin Çelebi b. Mustafa ve gayruhum mine’l-huzzâr.