Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 137 Hüküm no: 92 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vakfı olan arsa ile İsayi v. Begos’un mülk evinin istibdal edildiği Mahmiye-i İstanbul’da Abdi Çelebi Mahallesi’nde vâki‘ merhûme Âişe nâm sâhibetü’l-hayrın gallesi hayatda oldukça evvelen kendi nefsine ba‘dehâ atîkası Şahbaz bt. Abdullah’a ba‘dehâ merkūme Şahbaz’ın evlâdına ve evlâd-ı evlâdına ve evlâd-ı evlâd-ı evlâdına batnen ba‘de batnin ile’l-inkırâz ba‘dehâ mahalle-i mezbûre imâm ve müezzinine ve şürût-ı mezkûreye ri‘âyet müte‘azzir olur ise fukarâ-yı Müslimîne meşrûta vakfı olup İsayi v. Begos nâm zimmînin mülk binâsı tahtında vâki‘ bir tarafdan Eskici Haçador ve Mirze nâm zimmîlerin tasarruflarında olan menzil ve bir tarafdan Kivork zimmî mülkü ve bir tarafdan Marvikoğlu veresesi mülkü ve bir tarafdan tarîk-i hâs ile mahdûd arsasının bâ-berât-ı âlî-şân mütevellîsi olan fahrü’l-müderrisîni’l-kirâm Ahmed Efendi b. ( ) meclis-i şer‘-i şerîf-i enverde mezbûr İsayi zimmî muvâcehesinde ikrâr ve takrîr-i kelâm edip İsayi zimmînin mülk binâsı tahtında olan arsa-yı mezbûreyi yine mezbûr İsayi’nin mülk-i mahzı olup Ali Fakih Mahallesi’nde vâki‘ bir tarafdan Süleyman Çelebi menzili ve bir tarafdan Ahmed Ağa bahçesi ve bir tarafdan Şa‘ban Efendi veresesi mülkü ve bir tarafdan tarîk-i âm ile mahdûd fevkānî bir şehnişînli oda ve dehlîz ve tahtânî bir oda ve bir matbah ve havlu ve bi’r-i mâ ve kenîf ve etrâfında müceddeden taş duvarı müştemil menzil ile istibdâl eylemek murâd etmeğin hâlâ arsa-yı mezbûre ile menzil-i mezbûr taraf-ı şer‘den keşfolunup mülk olan menzil rey‘ ve rağbet ve kıymet cihetlerinden vakıf olan arsadan a‘la ve ezyed ise istibdâle cânib-i şer‘den izin verilmek murâdımdır deyü husûs-ı mezbûr için buyruldu-yı şerîf ibrâz eylediğinde taraf-ı şer‘den Mevlânâ İmâmzâde Mehmed Efendi irsâl olunup ol dahi hâssa mi‘mâr halîfelerinden Mehmed Halîfe b. Ali ve Hüseyin Halîfe b. Ali ve zeyl-i kitâbda muharrerü’l-esâmî bî-garaz Müslimîn ile evvelen arsa-yı mezbûre üzerine varıp Müslimîn-i mezbûrîn muvâcehesinde keşfolundukda arsa-yı mezbûre mecmû‘u altı yüz on dört zirâ‘ olup ve hâlâ mülk binâ ile meşgūl olmağla beher mâh on beş akçe ücret-i müeccelesinden mâ‘adâ taraf-ı vakfa nef‘i olmayıp yine ücret-i misliyyesi beher mâh ancak on beş akçe olup ve sâniyen mülk olan menzil-i mezbûrun üzerine varıp arsa ve ebniyesini mesâha eylediklerinde mecmû‘-ı arsası dört yüz elli beş zirâ‘ ve fevkānî oda ve dehlîz yüz beş zirâ‘ ve tahtânî oda ve matbah seksen zirâ‘ olup arsasının kıymeti beher zirâ‘ı otuzar akçeden on üç bin dört yüz yetmiş akçe ve fevkānî oda ve dehlîz zirâ‘ı yüzer akçeden on bin beş yüz akçe ve tahtânî oda ve matbah zirâ‘ı seksener akçeden yedi bin üç yüz yirmi akçe ve bi’r-i mâ üç bin akçe ve etrâfında üç yüz otuz beş zirâ‘ taş duvar zirâ‘ı kırkar akçeden on üç bin dört yüz akçe ki mecmû‘-ı menzil-i mezbûrun kıymeti kırk yedi bin altı yüz doksan akçe olup menzil-i mezbûrun arsası arsa-yı mevkūfe-i mezbûreden yüz altmış dokuz zirâ‘ noksan olup lâkin binâ ve rey‘ ve rağbet ve kıymet cihetinden ezyed ve evfer olmağla istibdâl olunmak cânib-i vakfa evlâ ve enfa‘dır deyü mi‘mârân-ı mezbûrân ve Müslimîn-i mezbûrîn icmâ‘ ve ittifâk edip ba‘dehû mevlânâ-yı mezbûr ile ma‘an meclis-i şer‘a gelip her biri haber verdiklerinden sonra husûs-ı mezbûr atebe-i aliyyeye arz ve i‘lâm olundukda istibdâle izn-i hümâyûnu nâtık emr-i celîlü’ş-şân vârid olmağın mûcebince kıbel-i şer‘den baʻde’l-izn mütevellî-i mûmâ-ileyh menzil-i mezbûr ile arsayı mübâdele-i şer‘iyye ile mübâdele arsa-yı mezbûreyi mülkiyet üzere mezbûr İsayi zabt ve menzil-i mezbûru vakfiyet üzere mütevellî-i merkūm Ahmed Efendi zabt eylediğini ikrâr ve birbirlerin meclis-i şer‘de tasdîk eylediklerinden hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi istibdâl-i vakfı tecvîz eden fukahâ-yı izâm kavl-i şerîfleri üzere sıhhat-i istibdâle hükmeylemeğin min-ba‘d zikr olunan arsa mülk ve menzil-i mezbûrânın bedeli vakıf olmağın tebdîl ve tağyîrine mecâl muhâl oldu. Cerâ zâlik ve hurrire fi’l-yevmi’l-hâmis aşer min-şehri Rebî‘ilevvel li-sene ihdâ ve işrîn ve mie ve elf mine’l-hicreti’n-nebeviyye. Şuhûdü’l-hâl: Osman Efendi b. Ali, diğer Osman Efendi b. Şa‘ban, Hasan Halîfe b. Mehmed el-Müezzin, Hüseyin Çelebi b. Hasan, es-Seyyid Ali Çelebi b. es-Seyyid Mustafa, Çorbacı Ahmed Ağa b. Abdullah, Hüseyin Çelebi b. Derviş, Abdullah Ağa b. Ali, el-Hâc Ahmed Efendi b. Mehmed, Süleyman Çelebi b. Abdullah ve gayruhum mine’l-huzzâr.