Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 138 Hüküm no: 93 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vakfı olan arsa ile İsayi v. Begos’un mülk evinin istibdali vakfın faydasına ise icra edilmesine dair İstabul kadısına hüküm Akdâ kudâti’l-Müslimîn evlâ vülâti’l-muvahhidîn ma‘deni’l-fazl ve’l-yakīn râfi‘u i‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtas bi-mezîd-i inâyeti’l-meliki’l-mu‘în Mevlânâ İstanbul kādısı zîde fezâiluhû tevkī‘-i refî‘-i hümâyûn vâsıl olıcak ma‘lûm ola ki mahmiye-i İstanbul’da Abdi Çelebi Mahallesi’nde vâki‘ Âişe Hatun Vakfı mütevellîsi olan Ahmed nâm kimesne meclis-i şer‘a varıp vakf-ı mezbûrdan olup İsayi nâm zimmînin mülk binâsı tahtında vâki‘ ma‘lûmü’l-hudûd arsayı yine mezbûr İsayi’nin mülkü olup mahmiye-i mezbûrede Ali Fakih Mahallesi’nde vâki‘ ma‘lûmü’l-hudûd fevkānî ve tahtânî iki bâb oda ve bir matbah ve dehlîz ve etrâfı taş duvarı müştemil menzil ile istibdâl murâd edip arsa-yı mezbûre ile menzil-i mezbûr ma‘rifet-i şer‘le keşfolundukda rey‘ ve rağbet ve kıymet cihetlerinden mülk olan menzil vakıf olan arsadan her vechile ezyed ve a‘lâ olup istibdâl olunmak vakfa nef‘-i mahzdır deyü cemm-i gafîr ihbâr etmeleriyle izn-i hümâyûnumu müş‘ir emr-i şerîfim verilmek ricâsına ilhâhıyla arz eylediğin ecilden vech-i meşrûh üzere istibdâl olunmak emrim olmuşdur buyurdum ki hükm-i şerîfimle ( ) vusûl buldukda bu bâbda sâdır olan emrim üzere amel dahi husûs-ı mezbûra tamam mukayyed olup göresin mülk olan menzil vakf olan menzilden kıymet ve rağbet ve vüs‘at cihetlerinden evfer ve ezyed olup istibdâl her vechile vakfa evlâ ve enfa‘ ise istibdâli tecvîz eyleyen fukahâ-yı zevi’l-ibtihâcın akvâl-i sahîhaları üzere vakf olan arsayı mülk ve mülk olan menzili vakf edip vakf-ı evvelin şürûtunu vakf-ı sânîde icrâ edip tarafeyne hüccet veresin şöyle bilesin alâmet-i şerîfe i‘timâd kılasın. Tahrîren fî-evâili şehri Rebîʻülâhir sene 1121 Be makām-ı Kostantıniyye el-mahrûse