Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 139 Hüküm no: 95 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun bt. Abdullah’ın evini Yani v. Aslan ile ortağı Simon v. Yani’ye sattığı Terkīn Mahmiye-i İstanbul’da Kâtib Hüsrev Mahallesi’nde sâkine zâtı Mehmed Çelebi b. Mehmed ve diğer Mehmed Çelebi b. Ahmed nâm kimesneler ta‘rîfleriyle mu‘arrefe olan Rukiye bt. Abdullah nâm hatun meclis-i şer‘-i şerîf-i enverde işbu râfi‘u’s-sifr Yani v. Aslan ve şerîki Simon v. Yani nâm zimmîler muvâcehelerinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûre Sinan Paşa Mahallesi’nde vâki‘ bir tarafdan Emine Hatun mülkü ve bir tarafdan Mustafa Çelebi b. Abdullah mülkü ve bir tarafdan İbrahim Çelebi mülkü ve bir tarafdan baʻzan tarîk-i hâs ve baʻzan tarîk-i âm ile mahdûd iki bâb fevkānî oda ve bir bâb tahtânî oda ve kenîf ve tûlen iki zirâ‘ arsa ve bir zirâ‘ sekiz parmak arsa üzerinde mebnî dehlîz havâsıyla müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûrân Yani ve Simon zimmîlere iştirâki’s-seviyy üzere yüz yirmi guruşa bey‘ ve teslîm ve temlîk edip onlar dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr yüz yirmi guruşu mezbûrân Yani ve Simon yedlerinden tamamen ahz u kabz eyledim baʻde’l-yevm menzil-i mahdûd-ı mezkûr cemî‘ müştemilâtıyla mezbûrân Yani ve Simon zimmînin mülk-i müşterâları olmuşdur keyfe mâ yeşâ ve yehtâr mutasarrıflar olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-şehri Rebî‘ülâhire li-sene 1121 Şuhûdü’l-hâl: Mehmed Efendi b. Mustafa el-İmâm, Ahmed Efendi b. Musa el-Müezzin, el-Hâc Yusuf b. Abdurrahman, Berber Mehmed Çelebi b. Abdullah, Mehmed Çelebi b. Mehmed, Mehmed Çelebi b. Ahmed, el-Hâc Mehmed b. Maden