Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 140 Hüküm no: 96 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simon v. Yani ile Yani v. Aslan’ın ortak oldukları evi Rukiye bt. Abdullah’a sattıkları Mahmiye-i İstanbul’da Samatya kurbünde el-Hâc Hüseyin Mahallesi’nde sâkin Simon v. Yani ve şerîki Yani v. Aslan nâm zimmîler meclis-i şer‘-i şerîf-i enverde işbu râfi‘atü’l-vesîka Rukiye bt. Abdullah nâm hatun mahzarında her biri ikrâr ve takrîr-i kelâm edip akd-i âti’z-zikrin sudûruna değin yedimizde mülk ve hakkımız olup mahmiye-i mezbûrede Kâtib Hüsrev Mahallesi’nde vâki‘ bir tarafdan Balcı el-Hâc Hasan Vakfı baʻzan bizim ve baʻzan tarîk-i hâs ile mahdûd fevkānî bir bâb oda ve bir sofa ve tahtânî bir bâb oda ve bir sofa ve bir kenîf ve bir mikdâr havluyu müştemil mülk menzilimizi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûre Rukiye Hatun’a iki yüz elli guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr iki yüz elli guruşu mezbûre Rukiye Hatun yedinden tamamen ahz u kabz eyledik baʻde’l-yevm menzil-i mahdûd-ı mezkûr cemî‘ müştemilâtıyla mezbûre Rukiye Hatun’un mülk-i müşterâ ve hakkı sırfı olmuşdur keyfe mâ teşâ ve tehtâr mutasarrıfe olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-şehri Rebî‘ülâhire sene 1121 Şuhûdü’l-hâl: Mehmed Efendi [b.] Mustafa el-İmâm, el-Hâc Yusuf b. Abdurrahman, Ahmed Efendi b. Musa el-Müderris, Mehmed Çelebi b. Mehmed, Mehmed Çelebi b. Ahmed.