Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 141 Hüküm no: 97 Orijinal metin no: [13b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hibetullah Hatun bt. Siyavuş b. Abdurrahman’ın geçinemediği kocası Mehmed Efendi b. Nasuh ile boşandıkları Mahmiye-i İstanbul’da Abdi Subaşı Mahallesi’nde sâkine Hibetullah bt. Siyavuş b. Abdurrahman nâm hatunun vâlidesi ve tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Mehmed Çavuş b. Himmet ve Ali Beşe b. Abdullah nâm kimesneler <> şehâdetleriyle şer‘an sâbit olan Emetullah bt. Sefer Efendi nâm hatun meclis-i şer‘-i şerîf-i enverde müvekkile-i mezbûrenin zevc-i dâhili işbu râfi‘u’l-kitâb Mehmed Efendi b. Nasuh nâm kimesne mahzarında bi’l-vech ikrâr ve takrîr-i kelâm edip mezbûr Mehmed Efendi kızım müvekkilem mezbûrenin zevci olup beynlerinde hüsn-i zindegāneleri olmamağla zimmetinde mütekarrer ve ma‘kūdün-aleyh olan elli bin akçe mehr-i müecceli ve nafaka-i iddet-i mu‘ayyene-i ma‘lûmesi üzerlerine ve mezbûrun firâşından hâsıl hamli olmağla hayyen tevellüd ettikde yedi yaşına değin müvekkilem mezbûre kendi mâlından infâk ve iksâ edip bi-emri’llâhi te‘âlâ hayyen tevellüd etmeyip veyâhud müddet-i madrûbe tamamından mukaddem fevt olursa nafaka-i bakiyyeden müvekkilem mezbûrenin zimmetini berî ve meûnet-i süknâsı dahi kendi üzerine olmak üzere zevci mezbûr Mehmed Efendi ile muhâla‘a-i sahîha-i şer‘iyye ile hul‘ olduğunda ol dahi hul‘-ı mezbûru baʻde’l-kabûl [14a] hukūk-ı zevciyete ve sâir târih-i kitâba gelince beynlerinde cereyân eden hukūk-ı ma‘lûme ve mechûleye müte‘allika âmme-i da‘vâdan her biri âharın zimmetini ibrâ ve iskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-şehri Rebî‘ülâhire li-sene 1121 Şuhûdü’l-hâl: el-Hâc Hasan Beşe b. Osman, Mustafa Çelebi b. Şa‘ban, Hasan Çelebi b. Abdullah, Hasan Beşe b. Davud, Ali b. Bâli.