Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 141 Hüküm no: 98 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Mustafa’nın Macar asıllı cariye Şahbaz bt. Abdullah’ı vefât eden kocası Ahmed Ağa’nın azat ettiğini kabul etmesiyle cariyenin hürriyetinin tasdik edildiği Mahmiye-i İstanbul’da Hocapaşa Câmi‘-i şerîfi kurbünde Karaki Mahallesi’nde sâkine olup zâtı İbrahim b. Mustafa ve Mehmed b. Mustafa nâm kimesne ta‘rîfleriyle mu‘arrefe Âişe bt. Mustafa nâm hatun meclis-i şer‘-i şerîf-i enverde mahalle-i mezbûre sükkânından iken bundan akdem vefât eden Ahmed Ağa b. Mustafa’nın mu‘takası olan orta boylu açık kaşlı gök elâ gözlü Macariyyetü’l-asl Müslimetü’l-mille râfi‘atü’l-vesîka Şahbaz bt. Abdullah nâm hatun tarafından husûs-ı âti’z-zikri tasdîka vekîl olduğu zât-ı mezbûreyi ma‘rifet-i şer‘iyye ile ârifân Hüseyin Ağa b. Hasan ve el-Hâc Nasuh b. Abdullah nâm kimesneler şehâdetleriyle şer‘an sâbit olan Ali Çelebi b. Ahmed nâm kimesne mahzarında ikrâr ve takrîr-i kelâm edip müvekkile-i mevsûfe-i mezbûre Şahbaz zevcim müteveffâ-i mezbûr Ahmed Ağa’nın câriye-i memlûkesi olup müteveffâ-i mezbûr mevsûfe-i mezbûreyi târih-i kitâbdan yedi sene mukaddem yedimde olan hüccet nâtık olduğu üzere yüz guruş semen-i medfû‘a bana bey‘ mülk-i müşterâm olmuş iken bana rıkkıyetden imtinâ‘ eder deyü bundan akdem huzûr-ı hâkimü’ş-şer‘de da‘vâ ettiğimde ol dahi müteveffâ-i mezbûr beni yedimde olan hüccet nâtıka olduğu üzere mâlından tahrîr ve i‘tâk etmişidi deyü mukaddem târihle bana bey‘i inkâr etmekle beynimiz[de] nizâ‘ı küllî cereyân etmişidi hâlâ ben zevcim ıtkını mücîze olup mezbûre Şahbaz’da alâka ve medhalim kalmayıp sâir harâir-i asliyyât gibi hürre olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 min-şehri Rebî‘ülâhire sene 1121 Şuhûdü’l-hâl: Mustafa, Mehmed Efendi b. Mustafa, İbrahim Efendi b. Mustafa, Hüseyin b. Hasan, Süleyman Ağa b. el-Hâc ( ), Mahmud Çelebi b. Abdullah, el-Hâc Ahmed b. Muslu.