Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 142 Hüküm no: 99 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azem v. Cako ile Kalos v. Marok’un alış-veriş davasından sulh olup zimmetlerine ibra ettikleri Mahmiye-i İstanbul’da Abdi Subaşı Mahallesi’nde sâkin Azem v. Cako nâm zimmî mahfil-i kazâda Kalos v. Marok nâm zimmî mahzarında ikrâr ve takrîr-i kelâm [edip] merkūm Kalos zimmetinde beynimizde ma‘lûm buğday bahâsından ve sefîne mahsûlünden otuz altı bin akçe hakkım olmağla meblağ-ı mezbûru taleb ve da‘vâ eylediğimde beynimizde nizâ‘-ı küllî vâki‘ olmuşdu hâlâ muslihûn tavassut edip merkūm Kalos da‘vâ-yı mezkûremden benimle yüz guruşa sulh oldukda ben dahi sulh-ı mezbûru kabûl ve bedel-i sulh olan meblağ-ı mezbûr yüz guruşu mukaddem Kalos yedinden ahz u kabz eylediğimden sonra sefîne-i mezbûre yine beynimizde müşterek kalıp iki buçuk seneden beynimizde cereyân eden ahz u i‘tâ ve mu‘âmelât-ı şettâya müte‘allika âmme-i de‘âvî ve mutâlebât ve muhâsamâtdan ben merkūm Kalos’un zimmetini ibrâ ve iskāt edip merkūm Kalos dahi kezâlik târih-i kitâba gelince beynimizde cereyân [eden] ahz u i‘tâya müte‘allika âmme-i da‘vâdan benim zimmetimi ibrâ ve iskāt eyledi dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-şehri Rebî‘ilâhıre li-sene ihdâ ve işrîn ve miʼete ve elf. Şuhûdü’l-hâl: el-Hâc Mustafa Efendi, Ali Çelebi b. Yahya, el-Hâc Ahmed b. Ali, el-Hâc Mehmed Arpacızâde, Kileci Mehmed Ağa, Mehmed Çelebi b. ( ).