Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 143 Hüküm no: 100 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefîne reislerinden Nikola v. Asveder’in Azem v. Cako’ya 193,5 guruş borcu olduğu, ayrıca tahsil edilecek olan yüz guruştan da Azem’in hissesini vermeyi taahhüt ettiği İstinye nâhiyesine tâbi‘ Yeniköy nâm karyede sâkin sefîne reislerinden Nikola v. Asvader nâm zimmî mahfil-i kazâda işbu râfi‘u’s-sifr Azem v. Cako nâm zimmî mahzarında ikrâr ve takrîr-i kelâm edip bundan akdem merkūm Azem’den yüz seksen bir guruş karz alıp ve sermâye olmak üzere bir def‘a üç yüz guruş ve bir def‘a yüz guruş ve emriyle yazıcısından dahi iki yüz on iki buçuk guruş ki cem‘an yedi yüz doksan üç buçuk guruş ahz u kabz edip hâlâ yedimde ve zimmetimde olup ve beynimizde ma‘lûm yüz guruş dahi zâyi‘âtımız olmağla tahsîl olunursa meblağ-ı mezbûr yüz guruşun dört sehmden üç sehmi merkūm Azem’in ve bir sehmi benim olmağla tahsîle ta‘ahhüd eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-şehri Rebî‘ülâhir li-sene ihdâ ve işrîn ve miʼete ve elf. Şuhûdü’l-hâl: Mehmed Efendi el-Kâtib, el-Hâc Mustafa Efendi Kethüdâ-yı hazret-i efendi, el-Hâc Hüseyin Beşe Çukadâr, Mehmed Çelebi b. Abdullah ve gayruhum mine’l-huzzâr.