Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 143 Hüküm no: 101 Orijinal metin no: [14a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hürmüz v. Yani’nin evini müştemilâtıyla birlikte Fâtıma bt. İsmail’e sattığı Mahmiye-i İstanbul’da Fenerkapısı dâhilinde vâki‘ Abdi Subaşı Mahallesi sükkânından Hürmüz v. Yani nâm zimmî meclis-i şer‘-i şerîf-i enverde bâ‘isetü hâzihi’l-vesîka Fâtıma bt. İsmail nâm hatun tarafından husûs-ı âti’l-beyânı tasdîka vekîl olduğu zât-ı mezbûreyi ma‘rifet-i şer‘iyye ile ârifân Ahmed Çelebi b. Ahmed ve Hüseyin Çelebi b. Mustafa şehâdetleriyle şer‘an sâbit olan Ahmed Bey b. Abdullah mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan Canbaz Emir nâm Ermeni mülkü ve bir tarafdan Canbaz Burnaz Ermeni mülkü ve iki tarafdan tarîk-i âm ile mahdûd ulyâda üç bâb oda ve bir tahta-pûş ve kenîf ve vustâda üç bâb oda ve kenîf ve süflâda bir bâb oda ve kenîf ve havluyu müştemil mülk menzilimi cümle tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i mezbûre Fâtıma Hatun’a dokuz yüz elli guruşa bey‘ ve teslîm ve temlîk ol dahi minvâl-i muharrer üzere [14b] iştirâ ve tesellüm ve kabz ve kabûl eyledikden sonra semeni olan meblağ-ı mezbûru müvekkile-i mezbûre Fâtıma Hatun yedinden tamamen ahz u kabz eyledim fîmâ-ba‘d menzil-i mahdûd-ı mezbûrda alâka ve medhalim kalmayıp müvekkile-i mezbûre Fâtıma Hatun’un mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 20 min-şehri Rebîʻülâhir sene 1121 Şuhûdü’l-hâl: Süleyman Efendi b. Abdullah el-İmâm, Ahmed Çelebi b. Ahmed, Hüseyin Çelebi b. Mustafa, Çorbacı Ali Ağa b. Mahmud, Ali b. İvaz, Hüseyin Çelebi b. Mehmed, Mustafa Çelebi b. Şa‘ban, Hasan Çelebi b. Mustafa, Osman b. Hasan el-Muhzır ve gayruhum mine’l-huzzâr.