Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 144 Hüküm no: 102 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Abdullah’ın geçinemediği kocası Mustafa Çelebi b. Receb’den boşanıp birbirlerinin zimmetlerini ibra ettikleri Mahmiye-i İstanbul’da Zeyrek Mahallesi’nde sâkine olup zâtı ma‘rifet-i şer‘iyye ile ârifân el-Hâc Hasan b. Osman ve diğer Osman Ağa b. Mustafa nâm kimesneler ma‘rifetleriyle mu‘arrefe olan Âişe bt. Abdullah nâm hatun meclis-i şer‘-i şerîf-i enverde zevc-i dâhili işbu râfi‘u’l-vesîka Mustafa Çelebi b. Receb nâm kimesne mahzarında ikrâr-ı tâm ve takrîr-i kelâm edip mezbûr Mustafa zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan üç bin beş yüz akçe mehr-i müeccelimin bin beş yüz akçesi mukābelesinde mecmû‘u bin beş yüz akçe kıymetli mavi çukaya kaplı bir tilki nâfesi kürk ve bir bogasiye kaplı kuzu kürkü ve bir çuka çakşır ve iki destâr ve bir köhne Yanbolu kebesi ve bir köhne yorganı mezbûr Mustafa bana def‘ ü teslîm ben dahi yedinden ahz u kabz edip bâkī kalan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mustafa ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru kabûl ettiğinden sonra hukūk-ı zevciyete müte‘allika ve sâir târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan ben zevcim mezbûr Mustafa’nın zimmetini ibrâ-i âmm-ı râfi‘u’l-hısâm ile ibrâ ve iskāt edip ol dahi kezâlik hukūk-ı zevciyete müte‘allika ve sâir târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan benim zimmetimi ibrâ-i âmm-ı kātı‘u’n-nizâ‘la ibrâ ve iskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 18 min-şehri Rebîʻülâhir sene 1121. Şuhûdü’l-hâl: Yusuf Çavuş el-Mübâşir, Mehmed b. Mustafa el-Muhzır, el-Hâc Hasan b. Osman Çukadâr-ı hazret-i efendi, Osman Ağa b. Mustafa hüddâm-ı Câmi‘-i Sultan Selim, İbrahim Çelebi b. Süleyman Na‘lband-ı Boyacıkapısı, Çerâğī Çeşme kurbünde vâki‘ medresede sâkin es-Seyyid Mustafa b. Ali; Ömer Çelebi b. Ahmed Muhzır.