Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 145 Hüküm no: 103 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davud Çelebi b. Hacı İbrahim ile vâlidesi Ayşe Hatun bt. Mehmed’in arsası Habbaz İbrahim Ağa Vakfı’na ait evlerini Samsoncubaşı Mehmed Ağa b. Hasan’a sattıkları Mahmiye-i İstanbul’da Cibalikapısı dâhilinde Seferikoz Mahallesi sükkânından Davud Çelebi b. el-Hâc İbrahim ile vâlidesi Âişe bt. Mehmed nâm hatun tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Mehmed Efendi b. Mehmed ve Halil Çelebi b. Mehmed şehâdetleriyle şer‘an sâbit olan İbrahim Çelebi b. Halil nâm kimesne meclis-i şer‘-i şerîf-i enverde Dergâh-ı âlî dâme mahfûfen bi’l-me‘âlî yeniçerileri ocağında hâlâ Samsoncubaşı olup işbu kitâb-ı sıhhat-nisâbın hâfızı fahrü’l-akrân Mehmed Ağa b. Hasan tarafından husûs-ı câi’z-zikri tasdîka vekîl-i şer‘îsi olan çukadârı el-Hâc İbrahim b. Abdullah mahzarında her biri bi’l-asâle ve bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Ahmed Ağa menzili ve bir tarafdan baʻzan Süleyman Ağa ve baʻzan Hüseyin Çelebi tasarruflarında olan menzil ve bir tarafdan müşteri-i mezbûrun âhar menzili ve bir tarafdan tarîk-i âm ile mahdûd tabaka-i ulyâda üç bâb oda ve bir cihânnümâ ve bir sofa ve tabaka-i vustâda iki bâb oda ve bir matbah ve tabaka-i süflâda bir oda ve bir kenîf ve bir ahır ve bir fırın ve bir kömürhâne ve bir müşterek bi’r-i mâ ve bir mikdâr havluyu müştemil menzilin ebniyesi mülkümüz olup ve arsası dahi Habbâz İbrahim Ağa nâm sâhibü’l-hayrın mahalle-i mezbûr imâmına galle ve tevliyeti meşrûta vakfı olup ebniye-i memlûkemizi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkil-i müşârun-ileyh Mehmed Ağa’ya dört yüz guruşa bey‘ ve temlîk ve teslîm ve arsasını dahi bâ-ma‘rifet-i mütevellî yüz yirmi guruş bedel mukābelesinde ferağ ve tefvîz ol dahi ber-vech-i muharrer iştirâ ve temellük ve tesellüm ve tefevvüz ve kabûl edip semeni olan meblağ-ı mezbûr dört yüz guruş ile bedel-i merkūm yüz yirmi guruş ki cem‘an beş yüz guruşu her birimiz bi’l-asâle ve bi’l-vekâle bi-kadri’l-hısas müşârun-ileyh yedinden tamamen ahz u kabz eyledik baʻde’l-yevm menzil-i mahdûd-ı mezkûrun ebniyesi mülk-i müşterâsı ve arsası dahi dâhil-i havza-i tasarrufu olmuşdur keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 18 min-şehri Rebîʻülâhir sene 1121. Şuhûdü’l-hâl: Mehmed Efendi b. Mehmed el-İmâm, Mehmed Çelebi b. Ahmed el-Müezzin, Halil Usta b. el-Hâc İbrahim, Halil Çelebi b. Mehmed Kamilezâde, Ahmed Ağa Solak-ı rikāb, Ahmed Ağa b. Mustafa, İbrahim Çelebi b. Halil, Mustafa Çelebi b. Şa‘ban.