Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 146 Hüküm no: 104 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Panayot’un Tevkiî Ca‘fer Çelebi Mahallesi’ndeki evini Pelaş v. Yamandi’ye sattığı Mahmiye-i İstanbul’da Tevkī‘î Ca‘fer Çelebi Mahallesi’nde sâkin Yanaki v. Panayot nâm zimmî meclis-i şer‘-i şerîf-i enverde işbu bâ‘isü’s-sifr Pelaş v. Yamandi nâm zimmî muvâcehe ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Kevâkibzâde menzili ve bir tarafdan Yuvan zimmî menzili ve bir tarafdan Yorgi zimmî menzili ve bir tarafdan tarîk-i âm ile mahdûd fevkānî iki bâb oda ve bir mikdâr dehlîz ve bir matbah ve tahtânî bir bâb oda ve bir zîr-i zemîn ve bir kenîfi müştemil menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık ve’l-menâfi‘ tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Pelaş’a altı yüz altmış guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semen-i mezbûr altı yüz altmış guruşu mezbûr Pelaş zimmî bi’t-tamam bana def‘ ü teslîm ben dahi yedinden ahz u kabz eyledim min-ba‘d menzil-i mahdûd-ı mezbûr merkūm Pelaş zimmînin mülk-i müşterâsı olup benim kat‘â alâkam ve medhalim kalmamışdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 min-şehri Rebîʻülâhir sene 1121 Şuhûdü’l-hâl: Hasan Çelebi b. Mehmed, Hüseyin Çelebi b. Hasan, Hasan Çelebi b. Abdullah, İbrahim Beşe b. Halil, İsmail Beşe b. Hüseyin, Mustafa Çelebi b. el-Hâc Mehmed, Mustafa Çelebi b. Şa‘ban ve gayruhum mine’l-huzzâr. Dorvi Derzi, Mosko Derzibaşı, Yorgo v. Todori, Zaharya v. Dimitri, Papa Yani v. Riga, Dimitri v. Hristo, Yuvan v. Petro, Kiro v. Hristodori.