Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 146 Hüküm no: 105 Orijinal metin no: [14b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simo v. Yani ile Bali v. Kaplan v. Marat’ın sahibi oldukları Hacıhüsrev Mahallesi’ndeki arsalarını İbrahim Çelebi b. Abdullah’a sattıkları Mübâya‘a Mahmiye-i İstanbul’da el-Hâc Hüsrev Mahallesi’nde sâkin Simo v. Yani nâm zimmî kendi tarafından asıl ve mahmiye-i mezbûrede Samatya kurbünde el-Hâc Hüseyin Mahallesi’nde sâkin Bâli v. Kaplan v. Marat nâm zimmî tarafından husûs-ı âti’z-zikri ikrâra vekîl olduğu Yusuf Beşe b. Musa ve Hüseyin Çelebi b. Mustafa nâm kimesneler şehâdetleriyle şer‘an sâbit olan mezbûr Simo zimmî mahfil-i kazâda işbu râfi‘u’l-vesîka İbrahim Çelebi b. Abdullah nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilim mezbûr Bâli ile yedimizde iştirâk-i seviyy üzere mülk ve hakkımız olup mârru’z--zikr el-Hâc Hüsrev Mahallesi’nde vâki‘ iki tarafdan bizim âhar mülkümüz ve bir tarafdan el-Hâc Hasan Vakfı odalar ve bir tarafdan müşteri-i mezbûr tasarrufunda olan vakıf menzil ile mahdûd bizim tarafımızda taş duvarı muhtevî tahmînen yirmi yedi zirâ‘ mülk arsa-yı hâliyemizi tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm İbrahim Çelebi’ye bi’l-asâle ve bi’l-vekâle yirmi guruşa bey‘ ve temlîk ve teslîm ol dahi [15a] ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yirmi guruşu mezbûr İbrahim Çelebi yedinden bi-kadri’l-hısas tamamen ahz u kabz eyledik fîmâ-ba‘d arsa-yı mezkûre mezbûr İbrahim Çelebi’nin mülk-i müşterâsı olup benim ve müvekkilim mezbûr Bâli’nin kat‘â alâkamız kalmamışdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-şehri Rebî‘ülevvel sene 1121. Şuhûdü’l-hâl: Mehmed Efendi b. Mustafa el-İmâm, Ahmed Çelebi b. Musa el-Müezzin, Hasan Çelebi b. Mustafa, Yusuf Çelebi b. Musa, Veli Efendi b. Abdullah, Hasan Efendi b. ( ), Hüseyin Çelebi, Ali b. İvaz el-Muhzır, Abdullah b. Mustafa el-Muhzır ve gayruhum mine’l-huzzâr.