Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 147 Hüküm no: 106 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. İsmail’in çocukluğunda kendisinin ihtiyaçlarını temin eden amcası Mustafa Çelebi b. Mehmed ile ortak oldukları ev bedelinden sekiz senelik kullanım hakkını alıp birbirlerinin zimmetini ibra ettikleri Mahmiye-i İstanbul’da Karabaş Mahallesi sükkânından İbrahim Çelebi b. İsmail nâm kimesne meclis-i şer‘-i şerîf-i enverde ammisi işbu râfi‘u’l-kitâb Mustafa Çelebi b. Mehmed nâm kimesne muvâcehesinde ikrâr ve takrîr-i kelâm edip mahalle-i mezkûrede vâki‘ ma‘lûmü’l-hudûd ve’l-müştemilât menzilin nısfı benim ve nısf-ı âharı ammim mezkûrun ale’l-iştirâki’s-seviyy mülkümüz olup benim hâl-i sıgārımda ammim mezbûr menzil-i mezkûrun müstakillen sâkin olup hâlâ ammim mezkûr sekiz senede müctemi‘ ve müstehak olduğum menzil-i mezkûrun ücretinden kırk sekiz guruşun def‘ ü teslîm ben dahi yedinden bi’t-tamam ve’l-kemâl ahz u kabz eyleyip husûs-ı mezkûra müte‘allika da‘vâdan ben ammim mezkûrun zimmetini ibrâ ve iskāt edip ammim mezkûr dahi hâl-i sıgārımda seni infâk ve iksâ etmişidim deyü benden da‘vâ sadedinde olmağla da‘vâ-yı mezkûresinden benim zimmetimi ibrâ ve iskāt eyledi baʻde’l-yevm târih-i kitâba gelince her birimizin âhar ile da‘vâ ve nizâ‘ımız kalmamışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 20 min-şehri Rebîʻülâhir sene 1121. Şuhûdü’l-hâl: Hasan Efendi b. Ali el-İmâm, İbrahim Ağa b. Mehmed, Halil Çelebi b. Şa‘ban, Ahmed Ağa b. Mehmed, Mehmed Çelebi b. Mustafa, el-Hâc Ahmed b. el-Hâc Mustafa, Musa Beşe b. Yusuf, Ahmed Çelebi b. Abdullah, Mustafa Beşe b. Ahmed, Ömer Çelebi b. Ramazan, Yahya Çelebi b. Ahmed, Mustafa b. Şa‘ban ve gayruhum mine’l-huzzâr.