Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 148 Hüküm no: 107 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Ahmed’in Malatya’da Köseler Mahallesi’ndeki bahçe ve evdeki hissesini Ahmed b. Mahmud’a sattığı Mahmiye-i İstanbul’da Keçeci Pîrî Mahallesi’nde sâkin Ali Ağa b. Ahmed nâm kimesne meclis-i şer‘-i şerîfde işbu bâ‘isü’l-kitâb Ahmed b. Mahmud tarafından husûs-ı âti’z-zikri tasdîka vekîl-i şer‘îsi olan Ömer Çelebi b. Mustafa mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i emlâkimden olup vilâyet-i Anadolu’da medîne-i Malatya’da Köseler Mahallesi’nde vâki‘ bir tarafdan İmâm Monla Süleyman menzili ve bir tarafdan Mustafa Çelebi menzili ve iki tarafdan tarîk-i âm ile mahdûd tahtânî üç bâb oda ve havluyu müştemil mülk menzil ile Çamözü nâm mahalde vâki‘ bir tarafdan Ali bahçesi ve bir tarafdan mahalle bahçesi ve bir tarafdan tarîk-i hâs ve bir tarafdan tarîk-i âm ile mahdûd mülk bahçede olan beş sehmden iki sehm hisse-i şer‘iyyemi tarafeynden îcâb ve kabûlü hâvî bey‘-i bâtt-ı sahîh-i şer‘î ile elli guruşa bi-safkatin vâhidetin müvekkil-i merkūm Ahmed’e bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr elli guruş da‘vâsından müvekkil-i mezbûr Ahmed’in zimmetini ibrâ-i âmm-ı kātı‘u’n-nizâ‘la ibrâ ve iskāt edip zikri mürûr eden menzil ve bahçede olan beş sehmden iki sehm hisse-i şâyi‘amı mahallinde zabt ve kabza mezbûr Ahmed’i taslît eyledim baʻde’l-yevm sâlifü’z-zikr bahçe ile menzil-i mahdûd-ı mezkûrda olan beş sehmden iki sehm hisse-i şâyi‘a mezbûr Ahmed’in mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 20 min-şehri Rebîʻülâhir sene 1121 Şuhûdü’l-hâl: Ömer Çelebi b. Mehmed, es-Seyyid Ali Çelebi b. Hüseyin, Hasan Çelebi b. Ali, Monla Mehmed b. Mustafa, Sağır Ebûbekir b. Mustafa, Hasan b. Ali, Ömer Beşe b. Mustafa, Mustafa b. Şa‘ban, Süleyman b. Abdullah, Hasan Çelebi b. Abdullah ve gayruhum mine’l-huzzâr.