Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 148 Hüküm no: 108 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Abdullah’ın Huri bt. Abraham’a emanet olarak bıraktığı çeşitli eşyalarının iadesi yoksa bedelinin ödemesi Mahmiye-i İstanbul’da Sultan Selim kurbünde sâkine Âişe Hanım bt. Abdullah tarafından husûs-ı âti’l-beyâna vekîl olduğu zâtını <> ârifân İbrahim b. Mehmed ve Süleyman b. Mehmed nâm kimesneler şehâdetleriyle sâbit olan işbu râfi‘u’l-kitâb el-Hâc Süleyman Ağa b. Mustafa nâm kimesne mahfil-i kazâda Huri bt. Abraham nâm Nasrâniye muvâcehesinde bi’l-vekâle üzerine da‘vâ ve takrîr-i kelâm edip merkūme Huri bundan akdem müvekkile-i mezbûrenin kırmızı atlas üzerine sarı sırma işleme on yasdık ve kırmızı çuka işleme kılabdanlı bir ocak yaşmağı ve bir kırmızı çuka üzerine işleme kapı perdesini bi-tarîkı’l-âriye ahz u kabz etmekle suâl olunup mevcûde ise a‘yânını müstehleke ise ba‘de’s-sübût kıymet-i şer‘iyyelerini edâya tenbîh olunmak bi’l-vekâle matlûbumdur dedikde gıbbe’s-suâl merkūme Huri cevâbında müvekkile-i mezbûre eşyâ-i mezbûreyi âhara rehin vaz‘ edip benim için akçe istikrâz eyle deyü bana verip ben dahi baʻde’l-kabz mezbûrenin emriyle eşyâ-i mezkûreyi Mustafa Ağa nâm kimesneden mezbûre için yüz yirmi guruş iktirâz ve kabz ve mezbûre Âişe Hanım’a teslîm ve eşyâ-i mezbûreyi mezbûr Mustafa Ağa’ya meblağ-ı mezkûr mukābelesinde emrine binâen rehin vaz‘ ve teslîm etmişidim deyücek isre’l-istintak ve’l-inkâr merkūme Huri’den sıdk-ı makāline beyyine taleb olundukda ityân-ı beyyineden izhâr-ı acz edip istihlâf etmeğin tahakkuk-ı özr-i şer‘îye binâen mezbûre Âişe Hanım’ı tahlîf için küttâb-ı mahkemeden Gümüşî Mehmed Efendi b. Yusuf irsâl olunup ol dahi mezbûre Âişe Hanım’ın sâkine olduğu menzile varıp zeyl-i kitâbda muharrerü’l-esâmî olan Müslimîn huzûrunda fi’l-vâki‘ eşyâ-i mezkûreyi âhara rehin ve kendi için istikrâza merkūme Huri’ye emr etmeyip ve merkūme Huri’den vech-i meşrûh üzere yüz yirmi guruşu ahz u kabz etmediğine şuhûd mahzarında mezbûre Âişe Hanım’a yemîn teklîf eyledikde ol dahi alâ-vefkı’l-mesûl hasmı muvâcehesinde yemîn biʼllâhi te‘âlâ ettiğini mûmâ-ileyh Mehmed Efendi mahallinde tahrîr ba‘dehû ma‘an irsâl olunan Çukadâr Hüseyin Beşe b. Mehmed ve Muhzır Mehmed b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mûcebince eşyâ-i mezkûrenin mevcûd ise a‘yânını müstehleke ise ba‘de’s-sübût kıymet-i şer‘iyyelerini müvekkile-i mezbûre Âişe Hanım’a edâya merkūme Huri’ye ba‘de’t-tenbîh mâ-vaka‘a bi’t-taleb ketb olundu. Fî-evâsıtı şehri Rebîʻülâhir sene 1121 Şuhûdü’l-hâl: Mehmed Efendi Gümüşîzâde, el-Hâc Mustafa Efendi b. ( ), İbrahim Çelebi b. Mehmed, Süleyman Çelebi b. Mehmed ve gayruhum mine’l-huzzâr.